İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 97 Hüküm no: 54 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İncici Yaşova’ya babası İlya v. Mosi’den mîrâs kalan kuyumcu dükkânı için hüccet verilmesi Kuyumcu ihbârı Mahmiye-i İstanbul’da vâki‘ âyîneceler içinde vâki‘ çukacı dükkânı fevkınde kâin bir bâb kuyumcu odası derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmeye mâlik iken bundan akdem hâlik olan Kuyumcu İlya v. Mosi nâm Yahûdînin sulbî kebîr oğlu ve hasren vârisi işbu bâ‘isü’s-sifr İncüci Yaşova nâm Yahûdî meclis-i şer‘-i hatîr-i lâzımü’t-tevkīrde kuyumcu esnâfının Kethudâsı Ali Ağa b. İbrahim nâm kimesne ile mütevellîleri Takfor v. Mosis ve nâzır Bedros v. Karabet nâm zimmîler ve sâirleri hâzır oldukları hâlde takrîr-i kelâm ve ifâde-i merâm edip mahmiye-i mahkiyede Mercan çarşısı kurbünde âyîneceler içinde kuyumcular sokaklarından Reisoğlu sokağında vâki‘ çukacı dükkânı fevkınde kâin ma‘lûmü’l-hudûd bir bâb kuyumcu odası derûnunda mevcûde beyne’l-hıref gedik ta‘bîr olunur âlât-ı lâzıme oda-i merkūmenin bi’l-icâzeteyn mutasarrıfları mühürleriyle memhûr bir kıt‘a temessük mûcebince babam hâlik-i mersûmun ile’l-helâk yedinde mâlı ve mülkü ve ba‘de helâkihî hasren bana mevrûs olup lâkin zikr olunan gedik ta‘bîr olunur âlât-ı lâzıme-i ma‘lûme ber-vech-i muharrer mâl-ı mevrûsum olduğunu mübeyyin yedimde hüccet-i şer‘iye olmamağla hakīkat-i hâl hâzırûn-ı merkūmundan lede’l-istihbâr taraf-ı şer‘den yedime bir kıt‘a hüccet i‘tâ olunmak bi’l-verâse matlûbumdur dedikde hâl bâlâda bast ü beyân olunan minvâl üzere olduğunu hâzırûn-ı merkūmûndan her biri alâ tarîki’ş-şehâde haber vermeleriyle vâki‘u’l-hâl hıfzen li’l-makāl bi’l-ibtiğā sebt ü imlâ olundu. Fî 6 M sene [1]238. Şühûdü’l-hâl: Muhzır Molla Halil, Muhzır Mahmud Çelebi, Molla Hüseyin.