Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 324 Hüküm no: 353 Orijinal metin no: [55a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nesli bt. İnebâli’nin evini Tanrıvermiş v. İnebâli’nin daha önceden satın almış olduğu Min mümzâtihî Mahmiye-i İstanbul’da Samatya kurbunda sâkin olup Yanaki v. Dimo ve Arslan v. Palologo ta‘rîfleriyle mu‘arrefe olan Nesli bt. İnebâli nâm Ermeniye meclis-i şerîf-i enverde zikri âtî menzile vâzı‘ü’l-yed olan işbu bâ‘isü’l-vesîka Tanrıvermiş v. İnebâli nâm Ermeni muvâcehesinde üzerine da‘vâ ve takrîr-i kelâm edip Havâss-ı Aliyye kazâsına tâbi‘ İstefanos nâm karyede vâki‘ bir tarafı Londari ve bir tarafı sâhil-i bahr ve bir tarafı Dulkarı menzili demekle ma‘rûfe menzili ve bir tarafı tarîk-i âm ile mahdûd menzilimi mezbûr Tanrıvermiş bi gayri hakkın zabt ve tasarruf eder suâl olunup menzil-i mezbûrdan kasr-ı yed ve bana teslîme tenbîh olunması matlûbumdur dedikde gıbbe’s-suâl mezbûr Tanrıvermiş cevâbında müdde‘iye-i mezbûre Nesli menzil-i mahdûd-ı mezbûru târih-i kitâb senesi Cumâdelâhiresi’nin yirmi yedinci günü yüz altmış guruşa bana bey‘-i kat‘î ile bey‘ ve teslîm ben dahi iştirâ ve kabûl ve kabz edip semeni olan meblağ-ı mezbûru kendiye teslîm ol dahi ahz u kabz edip hattâ mezbûre Nesli târih-i mezbûrda yedine Hazret-i Ebâ Eyyûb el-Ensârî -radiye anhü’l-Bârî-’de nâibü’ş-şer‘i’ş-şerîf olan el-Hâc Abdullah Efendi b. Mustafa huzûrunda ber vech-i muharrer bey‘ ve semenini kabzını ikrâr edip bana hüccet-i şer‘iyye dahi ibrâz etmeğin gıbbe’l-istintâk ve’l-inkâr, mezbûr Tanrıvermiş’den def‘-i meşrûhuna beyyine taleb olundukda isbât-ı beyyineden izhâr-ı acz ve istihlâf ettikde, fi’l-hakīka menzil-i mezbûru ber vech-i muharrer mezkûr Tanrıvermiş’e bey‘ ve kabz-ı semen etmediğine mezbûre Nesli’ye yemîn teklîf olundukda yemînden nükûl etmeğin mûcebince mezbûre Nesli bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâmin min şehri Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: (…).