İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 105 Hüküm no: 63 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafından Çemişgezekli Ali Beşe b. Hasan’ın mâlik olduğu bakkal dükkânını Mihal ve Yorgi veledey Marat’a sattığı Cağalzâde Sarayı kurbünde bakkāl Mahmiye-i İstanbul’da kâin bakkāl esnâfından Çemişgezekli Ali Beşe b. Hasan nâm kimesne meclis-i şer‘-i şerîf-i enverde esnâf-ı mezkûreden işbu bâ‘isü’s-sifr Mihal ve Yorgi veledey Marat nâm zimmîler muvâcehelerinde ikrâr-ı tam ve takrîr-i kelâm edip mahmiye-i mahkiyede Cağalzâde Sarayı kurbünde çörekçi fırını ittisâlinde kâin el-Hâc İbrahim Ağa dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle kırk sehmi âharların ve mâ‘adâ seksen sehm hisse-i şâyi‘ası akd-i âti’z-zikrin sudûruna değin işbu yedimde olan bir kıt‘a hüccet-i şer‘iye ile diğer bir kıt‘a hüccet-i şer‘iye hâmişleri mûceblerince yedimde mâlım ve mülküm olmağla ben âlât-ı lâzıme-i ma‘lûme-i mezkûreden ber-i‘tibâr-ı mezkûr mâlik olduğum seksen sehm hisse-i şâyi‘amın altmış sehmini mülkümde ibkā ve mâ‘adâ yirmi sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve âhar şerîklerim izin ve icâzetleri ve pazarbaşısı ve bölükbaşı ve bi’l-cümle nizâm ustaları ma‘rifetleriyle mersûmân Mihal ve Yorgi zimmîlere yedi yüz elli guruşa ale’l-iştirâki’s-seviyy bey‘ ü temlik ve vech-i lâyıkı üzere teslîm eylediğimde onlar dahi iştirâken iştirâ ve temellük ve tesellüm ve kabz ü kabûl ve semeni olan meblağ-ı merkūm yedi yüz elli guruşu bana def‘ ü teslîm eylediklerinde ben dahi yedlerinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika [14a] âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d sâlifü’l-beyân yirmi sehm hisse-i şâyi‘ada benim kat‘a alâka ve medhalim kalmayup mersûmân Mihal ve Yorgi zimmîlerin seviyyen müşterâ mâlları ve mülkleri olmuşdur dedikde gıbbe’t-tasdîki’ş-şer‘î mâ-vaka‘a [bi’t-taleb ketb olundu.] Fî 14 M sene [1]238. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed Efendi, Kābız-ı mâl Simyon, Yazıcı Eftat, Çakıroğlu Yorgi, Şişman Lefter, Düğenci Yuvan.