Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 325 Hüküm no: 354 Orijinal metin no: [55b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hafız Mehmed Efendi’nin Salih Çelebi b. Ahmed’den muhâlaa yoluyla boşandığı Mahmiye-i İstanbul’da Debbâğzâde mahallesi sâkinelerinden Fâtıma bt. Hâfız Mehmed Efendi nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân İbrahim Çelebi b. Receb ve Ömer Çelebi b. Şaban nâm kimesneler şehâdetleriyle şer‘an sâbit olan Hâfız Mehmed Efendi b. Hüseyin nâm kimesne meclis-i şer‘-i şerîf-i enverde müvekkile-i mezbûrenin zevc-i dâhili bâ‘isü hâze’l-kitâb Sâlih Çelebi b. Ahmed mahzarında bi’l-vekâle ikrâr ve takrîr-i kelâm edip müvekkilem mezbûre Fâtıma’nın zevci mezbûr Sâlih Çelebi ile beynlerinde hüsn-i zindegânîleri olmamağla zimmetinde mütekarrir ve ma‘kūdun-aleyh olan dört bin akçe mehr-i müeccele ve nafaka-i iddet-i ma‘lûmesi üzerlerine ve me’ûnet-i süknâsı dahi kendi üzerine olup ve mezbûr Sâlih Çelebi’nin firâşından hâsıla mezbûre Fâtıma’dan mütevellide bir buçuk yaşında olan sagīre kızı Rukiye’yi dokuz yaşını tekmîl olunca değin kendi malından infâk ve iksâ etmek üzre mezbûr Sâlih Çelebi ile bi’l-vekâle muhâla‘a-i sahîha-i şer‘iyye ile muhâla‘a olup ol dahi ber vech-i muharrer hul‘-ı mezbûrun kabûl eylediğinden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: Mehmed Çelebi b. Yusuf, Ali Çelebi b. Halil, Mehmed Efendi b. Ahmed, Ramazan b. Ali, Mehmed Çelebi b. Ebûbekir, el-Hâc Mustafa b. Tevekkül ve gayruhüm.