Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 326 Hüküm no: 355 Orijinal metin no: [55b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Maden’in Mehmed b. Şaban’dan alacaklı olduğu Mahmiye-i İstanbul’da Kazasker mahallesinde sâkin bâ‘isü hâze’l-kitâb Mehmed b. Maden nâm kimesne meclis-i şer‘-i şerîfde Mehmed b. Şaban nâm kimesne mahzarında üzerine da‘vâ ve takrîr-i kelâm edip mezbûr Mehmed zimmetinde cihet-i karz-ı şer‘îden yirmi esedî guruş hakkım olmağın mezbûr Mehmed’den taleb eylediğimde bana edâdan imtinâ‘ eder mezbûr Mehmed suâl olunup meblağ-ı mezbûr yirmi esedî guruşun bana alıverilmesi matlûbumdur dedikde gıbbe’s-suâl mezbûr Mehmed cevâbında kaziyye minvâl-i muharrer üzre olup cihet-i mezkûreden müdde‘î-i mezbûra zimmetimde vâcibü’l-edâ ve lâzımü’l-kazâ yirmi esedî guruş deynimdir deyû tâyi‘an ikrâr ve i‘tirâf etmeğin mûcebince meblağ-ı mezbûr yirmi esedî guruşu müdde‘î-i mezbûra edâ ve teslîme mezbûr Mehmed’e tenbîh olunup mâ vaka‘a bi’t-taleb ketb olundu. Fi’l-yevmi’s-sânî min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Mustafa b. Tevekkül, Mustafa Çelebi b. el-Hâc Ahmed, İbrahim Çelebi b. Halil, İsmail Çelebi b. Mehmed ve gayruhüm.