Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 326 Hüküm no: 356 Orijinal metin no: [55b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Halil’in Ayşe bt. Abdi’den alacaklı olduğu Mahmiye-i İstanbul’da Şeyh Ebülvefâ mahallesinde sâkin bâ‘isü hâze’l-kitâb Mehmed b. Halil nâm kimesne meclis-i şer‘-i şerîf-i enverde mahalle-i mezbûrede sâkine Ayşe bt. Abdi nâm hâtun mahzarında üzerine da‘vâ ve takrîr-i kelâm edip mezbûre Ayşe Hâtun zimmetinde cihet-i karz-ı şer‘îden otuz guruş hakkım olmağla suâl olunup meblağ-ı mezbûru bana edâya tenbîh olunmak matlûbumdur dedikde gıbbe’s-suâl mezbûre Ayşe Hâtun cevâbında müdde‘î-i mezbûra cihet-i mezbûreden ancak yirmi yedi buçuk guruş deynim vardır deyû ikrâr ziyâde iki buçuk guruşunu inkâr edicek müdde‘î-i mezbûr ziyâdesi için beyyineye havâle olundukdan sonra mezbûre Ayşe Hâtun’un ikrârı mertebesi olan meblağ-ı mezbûr yirmi yedi buçuk guruşu müdde‘î-i mezbûra edâ ve teslîme tenbîh olunup mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: Ali b. ( ), Mehmed b. İdris, Ali b. Bâli, İbrahim b. Ahmed, el-Hâc Mustafa b. Tevekkül.