İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 131 Hüküm no: 94 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pavli v. Panayat’ın hurda enserci esnafı kethudalığına tayini Kethudâ nasbı Âsitâne-i aliyye ve bilâd-ı selâse ve tevâbi‘lerinde vâki‘ bi’l-cümle hurda enserci esnâfının Yiğitbaşısı Andon zimmî ile esnâfından Agop ve Kostandi ve Yorgi ve Bali ve Tagodoş ve Kiragos ve Avanes ve Manuk ve Kerope nâm zimmîler ve Yahûdîler ustalarından İsrail ve Yako ve Serope ve Norami ve Benyamin ve Salamon nâm Yahûdîler ve sâirleri kâhyaları diğer Kiragos v. Artin nâm zimmî hâzır olduğu hâlde meclis-i şer‘-i şerîf-i enverde esnâf-ı mezkûreden işbu hâmilü’r-rakīm Pavli v. Panyat nâm zimmî kezâlik hâzır olduğu hâlde her biri takrîr-i kelâm ve ta‘bîr ani’l-merâm edip esnâfımız kâhyası olan hâzır-ı mersûm diğer Kiragos zimmî bu esnâda sıla-i rahîm arzûsuyla vatan-ı asliyesine gitmek murâd eylediğinden kâhyalık-ı merkūmdan rızâsıyla keff-i yed etmekle yerine esnâf-ı mezkûrenin umûrunu rü’yete muktedir bir kâhya nasbı lâzım ve mühim olmağın esnâfımızdan olup örf ve âdetimizi ve şurût-ı nizâmımızı bilir ve her vechile kâhyalık umûrunu rü’yete kādir ve cümlemizin merzî ve muhtârımız olan hâzır-ı mesfûr Pavli zimmî esnâfımız üzerine kâhya nasb ü ta‘yîn olunmak matlûbumuzdur dediklerinde [21b] hâzır-ı mersûm diğer Kiragos zimmî ba‘de’t-tasdîk hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb -tûbâ-lehû ve hüsnü-meâb- efendi hazretleri dahi hâzır-ı mersûm Pavli zimmîyi esnâf-ı mezkûre üzerlerine kâhya nasb ü ta‘yîn ve esnâfından bir ferde hilâf-ı şer‘-i şerîf ve mugāyir-i nizâm te‘addî ve rencîde etmemek üzere emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-vaka‘a [bi’t-taleb ketb olundu.] Fî 18 S sene [1]238. Şühûdü’l-hâl: Muhzır Molla Halil, Molla Mahmud el-Muhzır, Muhzır Molla Hüseyin.