İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 132 Hüküm no: 95 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hınta ve şa’îr döğücü esnafından Mustafa Ağa b. Mehmed’in borcuna karşılık döğücü dükkânını Seyyid İbrahim Kaptan’a rehin bıraktığı İdâne-i rehn-i hınta ve şa‘îr döğücü dükkânı Mahmiye-i İstanbul’da vâki‘ hınta ve şa‘îr döğücü esnâfından Mustafa Ağa b. Mehmed nâm kimesne meclis-i şer‘-i şerîf-i enverde işbu bâ‘isü’l-kitâb es-Seyyid İbrahim Kapdan b. es-Seyyid Süleyman nâm kimesne mahzarında ikrâr-ı tam ve takrîr-i kelâm edip merkūm es-Seyyid İbrahim Kapdan mâlından bana üç bin guruş ikrâz ve teslîm eylediğinde ben dahi yedinden iktirâz ve kabz ve umûruma sarfla istihlâk edip meblağ-ı merkūm ile semeni işbu târih-i vesîkadan iki sene tamamına değin müeccel ve mev‘ûd yine merkūm es-Seyyid İbrahim Kapdan’ın mâlından ve yedinden iştirâ ve kabz eylediğim bir cild Behcetü’l-fetâvâ semeninden dahi dokuz yüz guruş ki cem‘an üç bin dokuz yüz guruş zimmetinde merkūm es-Seyyid İbrahim Kapudan’a edâsı vâcib deynim olup meclis-i mecmû‘-ı mezkûr mukābelesinde yedimde bâ-hüccet-i şer‘iye mâlım ve mülküm olan mahmiye-i mezbûre hısnı ebvâbından Kapan-ı dakīk kapısı hâricinde döğücüler içinde vâki‘ Salih Usta ve Ali Usta dükkânları beynlerinde kâin bir bâb hınta ve şa‘îr döğücü dükkânı derûnunda mevcûde beyne’l-esnâf gedik ta‘bîr olunur bir kantar ve bir terâzî ve ma‘a-derâhim ve sâir âlât-ı lâzıme-i ma‘lûmemi rehn vaz‘ ve merkūm es-Seyyid İbrahim Kapdan’a teslîm eylediğimde ol dahi ber-vech-i muharrer yedimden irtihân ve kabz ü kabûl ve yine âlât-ı lâzıme-i mezkûreyi bana îdâ‘ ve teslîm eylediğinde ben dahi yedinden istîd‘â ve kabz etmemle ol-vechle âlât-ı lâzıme-i mezkûre merkūm es-Seyyid İbrahim Kapudan’a olan meblağ-ı mecmû‘-ı mezkûr üç bin dokuz yüz guruş deynim mukābelesinde rehin olup yedimde âriyetdir dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 19 S sene [1]238. Şühûdü’l-hâl: Döğücübaşı Mustafa Ağa b. Hüseyin, Mehmed Ağa b. Hüseyin, Salih Ağa b. Mehmed, Süleyman Ağa b. Mehmed.