Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 326 Hüküm no: 357 Orijinal metin no: [55b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Ali’nin Arakil v. Evgar’dan buğday satışından alacaklı olduğu Mahmiye-i İstanbul’da el-Hâc Hasan mahallesinde sâkin buğdaycı tâifesinden bâ‘isü hâze’l-kitâb Ahmed b. Ali nâm kimesne meclis-i şer‘-i şerîf-i enverde mahmiye-i mezbûrda İncirdibin demekle ma‘rûf fırında ekmekçi olan Arakil v. Evgar nâm zimmî muvâcehesinde üzerine da‘vâ ve takrîr-i kelâm edip târih-i kitâbdan üç ay mukaddem her keyl yüz seksen buçuk akçeye olmak üzre yüz iki keyl buğdayımı on sekiz bin dört yüz on bir akçeye bey‘ ve teslîm ol dahi ber vech-i muharrer iştirâ ve kabz ve tesellüm eylediğinden sonra meblağ-ı mezbûrun on üç bin üç yüz kırk akçesin yedinden ahz u kabz edip dört bin dokuz yüz yetmiş bir akçe zimmetinde bâkī kalmağla suâl olunup meblağ-ı bâkī-i mezbûru dahi bana edâ ve teslîme tenbîh olunmak matlûbumdur dedikde gıbbe’s-suâl ve’l-inkâr, müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahrûse-i Galata müzâfâtından kasaba-i Tophâne’de Karabaş mahallesinde sâkin Abdülcelil b. Mahmud ve sefîne reislerinden Mehmed b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Ahmed b. Ali târih-i mezbûrda her keyl yüz seksen buçuk olmak üzre yüz iki keyl buğdayını on sekiz bin dört yüz on bir akçeye mezbûr Arakil’e bizim huzûrumuzda bey‘ ve teslîm ol dahi ber vech-i muharrer iştirâ ve kabz ve tesellüm eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm meblağ-ı bâkī-i mezbûr dört bin dokuz yüz yetmiş bir akçeyi dahi müdde‘î-i mezbûr[a] edâ ve teslîme mezbûr Arakil’e tenbîh birle mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: El-Hâc Mustafa b. Tevekkül, İbrahim Çelebi b. Ahmed, Mehmed b. İdris, Ali b. Bâli ve gayruhüm.