İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 146 Hüküm no: 113 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsak v. Nafdali ve Nesim v. İlya’nın camcı dükkânlarını Yako v. Salom’a sattığı << 1000 guruşa >> Cam bey‘ edici dükkânının Galata’ya nakli ve 1.000 guruşa mübâya‘ası Havâss-ı refî‘a kazâsına muzâfe Hasköy’de Kızılminâre mahallesinde mütemekkinler İsak v. Nafdali ve Nesim v. İlya nâm Yahûdîler meclis-i şer‘-i hatîr-i lâzımü’t-tevkīrde işbu hâmilü’r-rakīm Yako v. Salom nâm Yahûdî muvâcehesinde her biri ikrâr-ı tam ve takrîr-i kelâm edip mahmiye-i İstanbul’da Alacahamam kurbünde Horasancı dükkânı karşısında vâki‘ ma‘lûmü’l-hudûd bir bâb cam bey‘ edici camcı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âtiyyü’z-zikrin sudûruna değin ale’l-iştirâki’s-seviyy yedimizde olan bir kıt‘a hüccet-i şer‘iye mantûkumda mâlımız ve mülkümüz olmağla biz ber-minvâl-i muharrer mâlik olduğumuz âlât-ı lâzıme-i mezkûremizi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mersûm Yako Yahûdî’ye beş yüz guruşdan cem‘an bin guruşa bey‘ ve temlik ve vech-i lâyıkı üzere her birimiz teslîm eylediğimizde ol dahi yedimizden ber-vech-i mübeyyen iştirâ ve temellük ve tesellüm ve kabz ü kabûl ve semeni olan meblağ-ı mecmû‘-ı merkūm bin guruşu bize def‘ ü teslîm eylediğinde biz dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d dükkân-ı mezkûrun derûnunda mevcûde gedik ta‘bîr olunur âlât-ı lâzıme-i mezkûrede bizim kat‘a alâka ve medhalimiz kalmayup mersûm Yako zimmînin mâl-ı müşterâsı olmuşdur dedikde gıbbe’t-tasdîk mesfûr Yako Yahûdî meclis-i şer‘-i münîrde zikr olunan cam bey‘ edici dükkânlarında gedik mâlikleri olan kimesneler müstecir oldukları dükkânlarında gedik âlâtı karârı olmayıp diledikleri mahâlde istîcâr eyledikleri dükkâna mutasarrıfları rızâsıyla nakl ve cam bey‘ ve şirâ etmek camcı esnâfının şurût-ı nizâmımızdan olmağla ben dahi âlât-ı lâzıme-i mezkûremi dükkân-ı mezkûrdan mutasarrıfı ihrâc ve mahrûse-i Galata’da istîcâr eylediğim bir bâb mağazaya yine mutasarrıfı izniyle vaz‘ ve cam bey‘ ü şirâ eylediğim esnâf-ı mezkûrenin nizâmlarına mutâbık olduğu istihbâr olunmak matlûbumdur dedikde mukırr-ı mersûmun takrîr-i meşrûhu vâkı‘a mutâbık idüğünü zeyl-i kitâbda muharrerü’l-esâmî camcı esnâfı haber vermeleriyle mâ-vaka‘a bi’t-taleb [ketb olundu.] Fî 3 Ra sene [1]238. Şühûdü’l-hâl: Halil Ağa b. Lütfullah, Galatalı Osman Usta b. İbrahim, mütevellî Ali Usta b. Hüseyin, el-Hâc Mustafa Usta b. İsmail, Ahmed Ağa b. Hüseyin, Kulekapılı Mustafa Ağa b. Hacı Mehmed, Yiğitbaşı İsmail Ağa b. Ömer, Galatalı es-Seyyid İsmail Usta b. Halil, el-Hâc Ahmed b. Hüseyin, Kethudâ el-Hâc Ahmed b. İbrahim, Osman Usta b. Hüseyin, diğer Ahmed Ağa b. Mustafa.