İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 147 Hüküm no: 114 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi esnafından Osman Usta b. Mehmed’in mâlik olduğu çörekçi dükkânını Mustafa Usta b. Seyyid Mustafa ve Ahmed Alemdar b. Ali’ye sattığı Kumkapı nişâncısında simidci ve çörekçi Mahmiye-i İstanbul’da kâin çörekçi esnâfından Osman Usta b. Mehmed nâm kimesne meclis-i şer‘-i hatîr-i lâzımü’t-tevkīrde esnâf-ı mezkûreden işbu bâ‘iseyü’l-kitâb es-Seyyid Mustafa Usta b. es-Seyyid Mustafa ve Ahmed Alemdar b. Ali nâm kimesneler mahzarlarında ikrâr-ı tam ve takrîr-i kelâm edip mahmiye-i mezbûrede Kumkapı kurbünde Nişâncıpaşa Câmi‘-i şerîfi civârında vâki‘ ma‘lûmü’l-hudûd bir bâb simidci ve çörekçi fırını derûnunda mevcûde beyne’l-esnâf gedik ta‘bîr olunur ber-mûceb-i defter-i müfredât simidci ve çörekçi âlât-ı lâzımesinin yüz yirmi sehm i‘tibâriyle otuz sehmi mezbûrân es-Seyyid Mustafa Usta ve Ahmed Alemdar’ın yedlerinde mülkleri ve mâ‘adâsı olup akd-i âti’z-zikrin sudûruna değin yedimde olan bir kıt‘a i‘lâm-ı şer‘î ve bir kıt‘a hüccet-i şer‘iye mantûklarınca benim yedimde mâlım ve mülküm olan altmış sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûrân es-Seyyid Mustafa Usta ve Ahmed Alemdar’a ale’l-iştirâki’s-seviyy beş bin guruşa bey‘ ve temlik ve vech-i lâyıkı üzere teslîm eylediğimde onlar dahi ber-minvâl-i muharrer iştirâken yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm beş bin guruşu bana def‘ ü teslîm [26b] eylediklerinde ben dahi yedlerinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan simidci ve çörekçi gediği ta‘bîr olunur âlât-ı lâzıme-i ma‘lûmede benim kat‘a alâka ve medhalim kalmayup mezkûr otuzar sehmi bâlâda tahrîr olunduğu üzere mukaddemâ ve otuzar sehmi hâlâ şirâen ki cem‘an altmış sehmi mezbûr es-Seyyid Mustafa Usta’nın ve altmış sehmi merkūm Ahmed Alemdar’ın mâlları ve mülkleri ve hakk-ı sırfları olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 2 Ra sene [1]238. Şühûdü’l-hâl: Dikilitaşlı Süleyman Alemdar Usta, Kethudâ İbrahim Ağa b. Mustafa, Yiğitbaşı Civelek Mehmed Usta b. Osman, Yazıcı Ali Efendi b. Süleyman, Galatalı es-Seyyid Ömer Usta, el-Hâc Mehmed Ağa b. Mustafa, Mahmudpaşalı İbrahim Usta.