İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 148 Hüküm no: 115 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin Efendi b. Ali’nin mâlik olduğu berber dükkânını hanımı Ayşe Hatun bt. Ömer’e sattığı İşbu gediğin nısfı âharın yedinde rehin iken kable’l-fekk bey‘ edip mürtehin mücîz olmamağla ba‘de edâi’d-deyn ve’l-fekk tekrar bey‘ olunup Cumâdelûlâ kayıdlarında mukayyed idüğü bu mahalle sebt olundu. << Mahmiye-i İstanbul’da Cerrâhpaşa kurbünde Tozkoparan nâm mahâlde sâkin Mehmed Emin Efendi b. Ali nâm kimesne meclis-i şer‘-i şerîf-i enverde zevce-i menkûhesi olup zâtı ta‘rîf-i şer‘î ile mu‘arrefe olan işbu bâ‘isetü’l-vesîka Âişe Hatun bt. Ömer mahzarında ikrâr-ı tam ve takrîr-i kelâm edip mahmiye-i İstanbul’da Aksaray kurbünde Gurebâ Hüseyin Ağa Câmi‘-i şerîfi civârında vâki‘ Edirneli Berber Emin Ağa dükkânı ve tarîk-i hâs ile mahdûd şehriye üç guruş kadîm kirâlı berber dükkânı bi’l-icâreteyn taht-ı tasarrufumda ve derûnunda mevcûde başmuhâsebe kaleminde kendi ismime mukayyed beyne’l-esnâf gedik ta‘bîr olunur âlât-ı lâzıme-i ma‘lûme dahi akd-i âti’z-zikrin sudûruna değin benim yedimde mâlım ve mülküm olmağla ber-vech-i muharrer mâlik olduğum âlât-ı lâzıme-i mezkûremi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile bin altı yüz guruşa zevcem mezbûre Âişe Hatun’a bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm bin altı yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunur âlât-ı lâzıme-i ma‘lûmede benim kat‘a alâka ve medhalim kalmayup zevcem mezbûre Âişe Hatun’un mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 9 Ra sene [1]238. >> Şühûdü’l-hâl: Köşe ustası Selim Ağa, Kethudâ vekîli İbrahim Ağa, Şeyh el-Hâc Musa, Yiğitbaşı es-Seyyid Mehmed Nuri, Du‘âcı el-Hâc Abdullah, Çavuş Mustafa Usta.