İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 149 Hüküm no: 116 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Ali Efendi b. İbrahim’in mâlik olduğu nalbant dükkânını Çatak Mehmed Usta b. Veliyüddin’e sattığı Irgat pazarında na‘lband Mahmiye-i İstanbul’da kâin na‘lband esnâfından el-Hâc Hafız Ali Efendi b. İbrahim nâm kimesne meclis-i şer‘-i şerîf-i enverde işbu bâ‘isü’l-kitâb Çatak Mehmed Usta b. Veliyüddin nâm kimesne muvâcehesinde ikrâr-ı tam ve takrîr-i kelâm edip mahmiye-i mahkiyede Irgad Pazarında Çilingirler içinde vâki‘ ma‘lûmü’l-hudûd bir bâb na‘lband dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısfı merkūm Çatak Mehmed Usta’nın ve nısf-ı âharı akd-i âti’z-zikrin sudûruna değin benim yedimde mâlım ve mülküm olmağla ber-vech-i mübeyyen mâlik olduğum nısf hisse-i şâyi‘a-i mezkûremi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm Çatak Mehmed Usta’ya üç bin beş yüz guruşa bey‘ ve temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm üç bin beş yüz guruşa takas ve mahsûb eylediğinde ol dahi mukāssa ve kabûl edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d semen-i merkūmdan [27a] benim merkūm Çatak Mehmed Usta zimmetinde ve deyn-i merkūmdan mezbûrun benim zimmetimde bir akçe ve bir habbe hakkım kalmamağla dükkân-ı mezkûr derûnunda mevcûde gedik ta‘bîr olunur âlât-ı lâzıme-i ma‘lûmede dahi benim kat‘a alâka ve medhalim kalmayup nısfı mukaddemâ ve nısf-ı âharı hâlâ şirâen ki mecmû‘-ı âlât-ı lâzıme-i mezkûre merkūm Çatak Mehmed Usta’nın mâlı ve mülkü olmuşdur keyfe mâ yeşâ ve yehtâr mutasarrıf olsun dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 9 Ra sene [1]238. Şühûdü’l-hâl: Kethudâ İsmail Ağa, Yiğitbaşı İsmail Usta, Meydancıklı Mehmed Usta, mütevellî Hüseyin Usta, Muhzır Molla Hüseyin.