İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 150 Hüküm no: 117 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağlıkçı esnafından İbrahim Edhem Ağa b. Ahmed’in mâlik olduğu yağlıkçı dükkânını Mustafa Ağa b. Hafız Mustafa’ya sattığı Yağlıkçı Mahmiye-i İstanbul’da kâin yağlıkçı esnâfından İbrahim Edhem Ağa b. Ahmed nâm kimesne meclis-i şer‘-i şerîf-i enverde bâ‘is-i hâze’l-kitâb el-Hâc Mustafa Ağa b. Hafız Mustafa nâm kimesne tarafından husûs-ı âti’l-beyânı tasdîka vekîli Kethudâ Hüseyin Ağa b. Ömer nâm kimesne mahzarında ikrâr-ı tam ve takrîr-i kelâm edip mahmiye-i İstanbul’da Çarşı-yı Kebîr’de Sahhâflar civârında vâki‘ Hasan Ağa ve Ömer Efendi dükkânları beynlerinde kâin bir bâb yağlıkçı dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet yedimde mâlım ve mülküm olan peştahta ve bir akçe tahtası ve bir minder ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile müvekkil-i merkūm el-Hâc Mustafa Ağa’ya iki bin beş yüz guruşa bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm iki bin beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı muharrere-i mezkûrede benim kat‘a alâka ve medhalim kalmayup müvekkil-i merkūm el-Hâc Mustafa Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 9 Ra sene [1]238. Şühûdü’l-hâl: Yiğitbaşı Memiş Ağa, Bölükbaşı İbrahim Ağa, es-Seyyid Ömer Ağa, diğer es-Seyyid İbrahim Ağa.