İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 151 Hüküm no: 118 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Efata bt. Aprosyos v. Atam’ın mâlik olduğu habbaz fırınını Kirkor v. Bağdesar’a sattığı Ortaköy’de habbâz fırını İhrâc şüd fî 16 R sene [1]261 Mahrûse-i Galata’ya muzâfe kasaba-i Beşiktaş’a tâbi‘ Ortaköy’de Kenîse sokağında mütemekkine Efata bt. Aprosyos v. Atam nâm Nasrâniye tarafından husûs-ı âti’l-beyânı ikrâr ve i‘tâ-i hüccete vekîl olduğu şahs-ı mersûmeyi bilir Bedirzâde el-Hâc İsmail Ağa b. Ali nâm kimesne ve Mardıros v. Melkon nâm zimmî şehâdetleriyle ber-nehc-i şer‘î sâbit olan Etmekçiler Kethudâsı Mehmed Efendi b. Ali nâm kimesne meclis-i şer‘-i hatîr-i lâzımü’t-tevkīrde habbâz esnâfından işbu hâmilü’r-rakīm Kirkor v. Bağdesar nâm zimmî muvâcehesinde bi’l-vekâle ikrâr-ı tam ve takrîr-i kelâm edip müvekkilem mesfûre Efata Nasrâniye zikr olunan Ortaköy’de vâki‘ Büyük fırın ta‘bîr olunur ma‘lûmü’l-hudûd bir bâb habbâz fırını ve ona merbût kezâlik ma‘lûmü’l-hudûd yedi horos bir bâb habbâz değirmeni derûnunda mevcûde beyne’l-esnâf gedik ta‘bîr olunur yirmi sekiz re’s bârgir ve sâir âlât-ı lâzıme-i ma‘lûmeden yirmi iki re’s bârgir ve onlara isâbet eden sâir âlât-ı lâzıme-i ma‘lûme âharların ve mâ‘adâ altı re’s bârgir ve onlara isâbet eden sâir âlât-ı lâzıme-i ma‘lûme benim mâlım ve mülküm olmağın ben âlât-ı lâzıme-i mezkûreden akd-i âti’z-zikrin sudûruna değin mâlım ve mülküm olan zikr olunan altı re’s bârgir ve onlara isâbet eden sâir âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şürekâ-i sâirem izin ve icâzetleriyle üç bin guruşa mesfûr Kirkor zimmîye bey‘ ve temlik ve vech-i lâyıkı üzere teslîm eylediğimde ol dahi yedimden ber-vech-i muharrer iştirâ ve temellük ve tesellüm ve kabz ü kabûl [27b] ve semeni olan meblağ-ı merkūm üç bin guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan altı re’s bârgir ve onlara isâbet eden sâir âlât-ı lâzıme-i ma‘lûmede benim kat‘a alâka ve medhalim kalmayup mesfûr Kirkor zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 6 Ra sene [1]238. Şühûdü’l-hudûd: Yiğitbaşı Mehmed Ali, Uncular Kethudâsı el-Hâc Mehmed Ağa, Murad Ağa, Yaşar Ağa, es-Seyyid Hasan Hoca, Usta Filibos, Usta Manas, Usta Agop.