İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 152 Hüküm no: 119 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Takohi, Zarek ve Viron benât-ı Ohannes v. Atam’ın habbaz fırını ve değirmenini Lazari v. Sava’ya sattıkları Ortaköy’de Küçük fırından sekiz re’s bârgir ve dört mıh âlât-ı lâzıme mübâya‘ası Mahrûse-i Galata hâricinde Beyoğlu nâm mahâlde mütemekkineler Takohi ve Zarek ve Viron benât-ı Ohannes v. Atam nâm Nasrâniyeler taraflarından husûs-ı âti’l-beyânı ikrâr ve i‘tâ-i hüccete vekîlleri olduğu şahıslarını bilir Mardıros v. Melkon ve Agop v. Avadik nâm zimmîler şehâdetleriyle ber-nehc-i şer‘î sâbit olan Kuyumcu Ohannes v. Ohannes nâm zimmî meclis-i şer‘-i şerîf-i enverde habbâz esnâfından bâ‘isü’s-sifr Lazari v. Sava nâm zimmî muvâcehesinde bi’l-vekâle ikrâr-ı tam ve takrîr-i kelâm edip müvekkilelerim mesfûrât Takohi ve Zarek ve Viron Nasrâniyeler mahrûse-i mezbûreye muzâfe kasaba-i Beşiktaş’a tâbi‘ Ortaköy’de vâki‘ Küçük fırın ta‘bîr olunur ma‘lûmü’l-hudûd bir bâb habbâz fırını ve ona merbût kezâlik ma‘lûmü’l-hudûd beş horoslu bir bâb habbâz değirmeni derûnunda mevcûde beyne’l-esnâf gedik ta‘bîr olunur yirmi re’s bârgir ve sâir âlât-ı lâzıme-i ma‘lûmeden on bir re’s bârgir ve sekiz mıh hissesi âharların ve mâ‘adâ sekiz buçuk re’s bârgir ve dört mıh hissesi seviyyen müşterek bizim mâlımız ve mülkümüz olmağın biz âlât-ı lâzıme-i mezkûreden akd-i âtiyyü’z-zikrin sudûruna değin ber-vech-i muharrer bizim mâlımız ve mülkümüz olan sekiz buçuk re’s bârgir ve dört mıh hissemizi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şürekâ-i sâiremiz izin ve icâzetleriyle dört bin guruşa mesfûr Lazari zimmîye bey‘ ve temlik ve vech-i lâyıkı üzere teslîm eylediğimizde ol dahi ber-minvâl-i muharrer yedimizden iştirâ ve temellük ve tesellüm ve kabz ü kabûl ve semeni olan meblağ-ı merkūm dört bin guruşu bize def‘ ü teslîm eylediğinde biz dahi yedinden bi-kadri’l-hısas tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan sekiz buçuk re’s bârgir ve dört mıh hisse-i şâyi‘ada bizim kat‘a alâka ve medhalimiz kalmayup mesfûr Lazari zimmînin mâl-ı müşterâsı ve hakk-ı sırfı olmuşdur dediler dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 6 Ra sene [1]238. Şühûdü’l-hâl: Ekmekçiler Kethudâsı Mehmed Efendi, Uncular Kethudâsı el-Hâc Mehmed, Murad Ağa, Yaşar Ağa, es-Seyyid Hasan Hoca, Usta Filipos, Usta Manas, Usta Agop.