İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 153 Hüküm no: 120 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafına on iki nizâm ustası, bir kabızımal ve bir yazıcı tayin edilmesi Bakkāların nizâm ustaları nasbı hücceti Mahmiye-i İstanbul’da kâin bi’l-cümle bakkāl esnâfının pazarbaşıları bulunan kimesne ile dâimâ pazarbaşı odası ta‘bîr eyledikleri lonca odalarında mevcûd olarak bi’l-cümle esnâf-ı mezkûrenin umûrunu rü’yet etmek üzere on iki nefer nizâm ustası ve bir nefer kābız-ı mâl ve bir nefer yazıcılar olmak nizâm-ı kadîmlerinden olup lâkin bir müddetden beri tâife-i Rum’un zuhûr eden hıyânetlerinden nâşi ancak esnâf-ı mezkûrenin kābız-ı mâl ve yazıcılarından gayri nizâm [28a] ustaları olmadığı umûr-ı esnâfın perîşâniyetini mûcib olur hâlâtdan olup ve hâlâ kābız-ı mâlları ve yazıcıları dahi rızâlarıyla terk etmeleriyle yerlerine esnâf-ı mezkûreye ke’l-evvel on iki nizâm ustası ve bir kābız-ı mâl ve bir yazıcı nasbı lâzım ve mühim olmağın hâkim-i sadr-ı kitâb -veffakallâhu te‘âlâ bi’s-sıdk ve’s-savâb- efendi hazretleri dahi esnâf-ı mezkûreden nizâm ustalığı ve kābız-ı mâl ve yazıcı umûrunu idâre ve rü’yete kādir ve şurût-ı nizâmlarını bilir ve beyne’l-esnâf mu‘teber oldukları pazarbaşıları Süleyman Ağa ve bölükbaşı Molla Abdi ve Pazarbaşı Kâtibi Ahmed Efendi ve İstanbul Bal Kapanı Nâzırı es-Seyyid el-Hâc Ahmed Alemdar ve Galata Yağ Kapanı nâzırları vekîli Süleyman Ağa ve Odunkapısı Kethudâsı Ömer Ağa ve Bal Kapanı ve Yağ Kapanı ve Odunkapısı tüccârından mazbûtü’l-esâmî Müslimîn haberleriyle zâhir ve mütehakkık olan işbu hâmilü’r-rakīm bakkāl esnâfından Hâcekadın Hamamlı Tanaş ve Mahmudpaşalı Şişman Lefter ve Taşkasablı Çakıroğlu Yorgi ve sâbık Kābız-ı mâl Yuvan ve Sarıgezli Mihal ve Peykhâneli İlya ve Küçükhammâmlı Düğenci ve Dülbentçi mahalleli Sava ve Odalarbaşlı Lazari ve Hasan Paşa hanlı Aci Yuvan ve yağcı bakkāllarından Havâss-ı refî‘a kazâsına muzâfe Çekmece-i kebîr nâhiyesine tâbi‘ Bigados karyeli Kosti ve yine yağcı bakkāllarından medîne-i Üsküdar’a tâbi‘ Bakkālköylü Andon nâm zimmîler her birini bi’l-iltimâs esnâf-ı merkūmeye nizâm ustası ve Balatlı Simyon nâm zimmîyi kābız-ı mâl ve Koskalı Eftat nâm zimmîyi yazıcı ve tüccâr mâlının muhâfazası içün Bal Kapanı tüccârından kasab dâmâdı el-Hâc Mustafa Ağa nâm kimesne dahi tüccâr tarafından olmak üzere esnâf-ı mezkûreye nâzır nasb ü ta‘yîn ve her biri dâimâ zikr olunan pazarbaşı odasında mevcûd bulunup umûr-ı esnâfı bi’l-ma‘iye lâyıkı vechile rü’yet edip hilâf-ı şer‘-i şerîf ve mugāyir-i nizâm-ı esnâf ve tüccârdan kimesneye te‘addî ve rencîde etmemek üzere emr ü tenbîh buyurduklarında onlar dahi kabûl ve ber-mûceb-i emr ü tenbîh amel ve harekete ta‘ahhüd etmeleriyle mâ-vaka‘a [bi’t-taleb ketb olundu.] Fî 18 Za sene [1]237. Şühûdü’l-hâl: Muhzır Molla Halil, Muhzır Molla Hüseyin, Muhzır Molla Mahmud, Muhzır Molla Mustafa, Muhzır Mehmed Emin.