İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 154 Hüküm no: 121 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki bakkal esnafının, Bakkal Yuvan v. Esterati’nin zimmetini ibra ettikleri Bakkāl kābız-ı mâlı olan Yuvan zimmînin zimmetini ibrâları Mahmiye-i İstanbul’da kâin bi’l-cümle bakkāl esnâfının hâlâ kābız-ı mâlları olan Balatlı Bakkāl Simyon v. Todori nâm zimmî esnâf-ı mezkûre Pazarbaşısı Süleyman Ağa ve Bölükbaşı Molla Abdi ve Kâtib Ahmed Efendi ve İstanbul Bal Kapanı nâzırı es-Seyyid el-Hâc Ahmed Alemdar ve Galata Yağ Kapanı nâzırı vekîli Süleyman Ağa ve Odunkapısı Kethudâsı Ömer Ağa nâm Müslimîn ve bakkāl esnâfının nizâm ustaları Hâcekadın Hammamlı Tanaş v. Kastandi ve Mahmudpaşalı Şişman Lefter v. Anaştaş ve Taşkasablı Çakıroğlu Yorgi v. Estavriyanos ve Sarıgezli Mihal v. Manil ve Peykhâneli İlya v. Peredomoz ve Küçükhammâmlı Düğenci v. Abraham ve Dülbentçi mahalleli Sava v. Yuvan ve Odalarbaşılı Lazari v. Yasef ve Hasan Paşa hanlı Aci Yuvan v. Kiryako ve yağcı bakkāllarından Bigados karyeli Kosti v. Lefter ve Bakkālköylü Andon v. Yani nâm zimmîler ile hâlâ esnâf-ı mezkûre Yazıcısı Koskalı Bakkāl Eftat v. Maroriyanos nâm zimmî hâzır oldukları hâlde esnâf-ı mezkûrenin mukaddemâ kābız-ı mâlleri olup rızâsıyla terk etmekle hâlâ nizâm ustası nasb olunan işbu hâmilü’r-rakīm Bakkāl Yuvan v. Esterati nâm zimmî muvâcehesinde hâzırûn-ı merkūmunun tasdîkleriyle ikrâr-ı tam ve takrîr-i kelâm edip mesfûr Bakkāl Yuvan zimmî bir müddetden beri esnâfımızın kābız-ı mâlları olup bu defa rızâsıyla terk ve esnâf-ı mezkûreye nizâm ustası ta‘yîn ve ben kābız-ı mâl nasb olunduğumuzda mesfûr Bakkāl Yuvan zimmînin kābız-ı mâl olduğu müddetde esnâf-ı merkūmenin emirleriyle bi’l-cümle makbûz ve masrûfunun hesâbını hâzırûn-ı merkūmun ve sâir esnâfımız ma‘rifetleriyle [28b] yegân yegân sahîhan rü’yet eylediğimizde mesfûr Bakkāl Yuvan zimmînin yed ve zimmetinde tüccâr-ı merkūmundan mâ‘adâ nizâm ustaları hâzırûn-ı mesfûrûnun ve benim bi’l-cümle esnâfımızın bir akçe ve bir habbe hakkımız zâhir olmayıp ancak bi’l-cümle esnâfımızın bi-şarti’r-rücû‘ emirleriyle umûr-ı lâzımelerine müddet-i medîdede mesfûr Bakkāl Yuvan zimmînin eylediği mesârifinden makbûlümüz olup esnâfımız üzerlerinde zuhûr eden yirmi iki bin beş yüz guruş alacak hakkını esnâfımızdan cem‘ ve tahsîl ve kabz ve kendüye teslîm etmek üzere beni ihâle ve tevkîl eylediğinde ben dahi ba‘de’l-kabûl meblağ-ı merkūmu ber-vech-i muharrer esnâfdan tahsîl ve kabz ve kendüye teslîme ta‘ahhüd etmemle fîmâ-ba‘d kābız-ı mâl olduğu müddetde ber-vech-i muharrer makbûz ve masrûfuna müte‘allika âmme-i da‘vâdan tüccâr-ı merkūmundan mâ‘adâ ben ve nizâm ustaları hâzırûn-ı mesfûrundan her birimiz mesfûr Bakkāl Yuvan zimmînin zimmetini kabûlü hâvî ibrâ ve iskāt dahi eyledik dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 18 Za sene [1]237. Şühûdü’l-hâl: Muhzır Molla Hüseyin, Muhzır Molla Halil, Muhzır Molla Mahmud, Muhzır Molla Mustafa, Muhzır Mehmed Emin.