İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 155 Hüküm no: 122 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe Hanım bt. Mustafa’nın un değirmeni gediğini Seyyid İsmail Ağa b. Kebecizade Seyyid Mehmed Said Ağa’ya sattığı Unkapanı’nda uncu değirmeni Mahmiye-i İstanbul’da Salma Tomruk kurbünde Hoca Kasım Gönânî mahallesinde sâkine Şerîfe Âişe Hanım bt. Mustafa’nın zevci ve tarafeynden husûs-ı âti’l-beyânı ikrâra vekîli olduğu zât-ı mezbûreyi bi’l-ma‘rifeti’ş-şer‘iye ârifân Uncular Kethudâsı el-Hâc Mehmed Ağa b. el-Hâc İbrahim ve Kapan-ı dakīk tüccârından Kebecizâde es-Seyyid el-Hâc Mehmed Ârif Ağa b. es-Seyyid el-Hâc İsmail şehâdetleriyle ber-nehc-i şer‘î sâbit olan Helvacı Hasan Ağa b. Mustafa nâm kimesne meclis-i şer‘-i şerîf-i enverde merkūm Kebecizâde es-Seyyid el-Hâc Mehmed Ârif Ağa hâzır olduğu hâlde işbu bâ‘isü’l-kitâb es-Seyyid İsmail Ağa b. Kebecizâde es-Seyyid el-Hâc Mehmed Said Ağa mahzarında bi’l-vekâle ikrâr-ı tam ve takrîr-i kelâm edip müvekkilem zevcem mezbûre Şerîfe Âişe Hanım mahmiye-i mezbûrede Unkapı kurbünde Arabacılar nâm mahâlde vâki‘ bahçeli değirmeni demekle şehîr ma‘lûmü’l-hudûd iki horos bir bâb uncu değirmeni derûnunda mevcûde beyne’l-esnâf gedik ta‘bîr olunur sekiz re’s bârgir ve sâir âlât-ı lâzıme-i ma‘lûmeden iki re’s bârgir ve onlara isâbet eden sâir âlât-ı lâzıme-i ma‘lûme merkūm es-Seyyid İsmail Ağa’nın dört re’s bârgir ve onlara isâbet eden sâir âlât-ı lâzıme-i ma‘lûme benim ve iki bârgir ve onlara isâbet eden sâir âlât-ı lâzıme-i ma‘lûme hâzır-ı mezbûr Kebecizâde es-Seyyid el-Hâc Mehmed Ârif Ağa’nın yedimizde iştirâken mâlımız ve mülkümüz olmağın ben âlât-ı lâzıme-i mezkûreden akd-i âti’z-zikrin sudûruna değin ber-vech-i muharrer mâlike olduğum dört re’s bârgir ve onlara isâbet eden sâir âlât-ı lâzıme-i ma‘lûmeyi üç bin guruşa ve hâzır-ı mezbûr Kebecizâde es-Seyyid el-Hâc Mehmed Ârif Ağa kezâlik mâlik olduğu iki re’s bârgir ve onlara isâbet eden sâir âlât-ı lâzıme-i ma‘lûmeyi bin beş yüz guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm es-Seyyid İsmail Ağa’ya bey‘ ve temlik ve teslîm eylediğimizde ol dahi ber-vech-i muharrer yedimizden iştirâ ve temellük ve tesellüm ve kabz ü kabûl ve semenleri olan meblagayn-ı merkūmeyn zikr olunan üç bin guruşu bana ve meblağ-ı mezbûr bin beş yüz guruşu hâzır-ı mezbûr es-Seyyid el-Hâc Mehmed Ağa’ya def‘ ü teslîm eylediğinde biz dahi yedinden her birimiz tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i mezkûrede bizim kat‘a alâka ve medhalimiz kalmayup ber-i‘tibâr-ı merkūm iki re’s bârgir ve onlara isâbet eden sâir âlât-ı lâzıme-i ma‘lûme mukaddemâ ve altı re’s bârgir ve onlara isâbet eden sâir âlât-ı lâzıme-i ma‘lûme hâlâ ber-minvâl-i muharrer şirâen ki mecmû‘u mezbûr es-Seyyid İsmail Ağa’nın [29a] mâl-ı müşterâsı ve hakk-ı sırfı olmuşdur dedi dedikde hâzır-ı merkūm es-Seyyid el-Hâc Mehmed Ârif Ağa ile mezbûr es-Seyyid İsmail Ağa’dan her biri ba‘de [’t-tasdîki’ş-şer‘î mâ-vaka‘a [bi’t-taleb ketb olundu.] Fî 9 Ra sene [1]238. Şühûdü’l-hâl: Ekmekçiler Kethudâsı Mehmed Efendi b. Ali, Uncular Kethudâsı el-Hâc Mehmed Ağa b. el-Hâc İbrahim, Hatîbzâde es-Seyyid el-Hâc Hasan Ağa b. Ali, es-Seyyid el-Hâc Veliyüddin Ağa, Kebecizâde es-Seyyid el-Hâc Mehmed Said Ağa b. es-Seyyid el-Hâc İsmail.