İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 156 Hüküm no: 123 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Mehmed Sadık’ın habbaz fırını ve değirmenini borcuna karşılık Hatibzade Seyyid Hasan Ağa b. Ali’ye rehin bıraktığı Hasköy’de habbâz Mahmiye-i İstanbul’da vâki‘ Kapan-ı dakīk tüccârından Sadık Ağazâde Ali Ağa b. Mehmed Sadık nâm kimesne meclis-i şer‘-i şerîf-i enverde yine kapan tüccârından bâ‘isü’l-kitâb Hatîbzâde es-Seyyid el-Hâc Hasan Ağa b. Ali tarafından husûs-ı âti’l-beyânı tasdîka vekîl-i müseccel-i şer‘îsi es-Seyyid Mustafa Ağa b. es-Seyyid el-Hâc Mehmed Emin nâm kimesne mahzarında ikrâr-ı tam ve takrîr-i kelâm edip Havâss-ı Refî‘a kazâsına muzâfe kasaba-i Hasköy’de Kızılminâre mahallesinde kâin ma‘lûmü’l-hudûd bir bâb habbâz fırını ve ona merbût ittisâlinde vâki‘ sekiz horos bir bâb habbâz değirmeni derûnunda mevcûde beyne’l-esnâf gedik ta‘bîr olunur otuz iki re’s bârgir ve sâir âlât-ı lâzıme-i ma‘lûmeden yedimde mâlım olan sekiz re’s bârgir ve yine değirmen-i merkūm ittisâlinde kâin ma‘lûmü’l-hudûd üç horos bir bâb uncu değirmeni derûnunda mevcûde beyne’l-esnâf gedik ta‘bîr olunur on iki re’s bârgir ve sâir âlât-ı lâzıme-i ma‘lûmeden kezâlik mâlım olan iki re’s bârgir ki cem‘an iki bâb değirmen gediklerinden mâlik olduğum on iki re’s bârgir ve sâir âlât-ı lâzıme-i ma‘lûmemi zikri âtî istidâne edeceğim meblağ mukābelesinde müvekkil-i merkūm Hatîbzâde es-Seyyid el-Hâc Hasan Ağa’ya evvelâ rehin vaz‘ ve vech-i lâyıkı üzere teslîm eylediğimde ol dahi yedimden irtihân ve kabz ve kabûl ettikden sonra müvekkil-i merkūm Hatîbzâde es-Seyyid el-Hâc Hasan Ağa mâlından bana altı bin beş yüz elli guruş ikrâz ve teslîm eylediğinde ben dahi yedinden iktirâz ve kabz ve umûruma sarfla istihlâk etmemle meblağ-ı mezbûr altı bin beş yüz elli guruş zimmetimde müvekkil-i merkūm Hatîbzâde es-Seyyid el-Hâc Hasan Ağa’ya edâsı vâcib sahîhan deynimdir dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 10 Ra sene [1]238. Şühûdü’l-hâl: es-Seyyid el-Hâc Veliyüddin Ağa b. Ali, Ekmekçiler Kethudâsı Mehmed Efendi b. Ali, Uncular Kethudâsı el-Hâc Mehmed Ağa b. el-Hâc İbrahim, Kebecizâde es-Seyyid el-Hâc Mehmed Ârif Ağa b. es-Seyyid el-Hâc İsmail ve Kırımîzâde es-Seyyid el-Hâc Musa Ağa b. el-Hâc İsmail.