İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 164 Hüküm no: 131 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Ebubekir b. Abdullah’ın zeyt yağcı mağazası gediğini Mehmed Yazıcı b. İbrahim’e sattığı Zeyt yağcı mağazası Hâlâ vilâyet-i Anadolu’da vâki‘ medîne-i Tokad’da sâkin Mustafa Ağa b. Ebûbekir b. Abdullah nâm kimesnenin li-ebeveyn er karındaşı ve tarafından husûs-ı âti’l-beyânı ikrâra vekîl olduğu Çörekçi Hüseyin Usta b. Mustafa ve Kahveci el-Hâc Hasan b. Ahmed nâm kimesneler şehâdetleriyle ber-nehc-i şer‘î sâbit olan Ali Odabaşı Ağa meclis-i şer‘-i hatîr-i lâzımü’t-tevkīrde işbu bâ‘isü’l-kitâb Odunkapılı Mehmed Yazıcı b. İbrahim mahzarında bi’l-vekâle ikrâr-ı tam ve takrîr-i kelâm edip müvekkilim karındaşım mezbûr Mustafa Ağa mahmiye-i İstanbul hısnı ebvâbından Zindân kapısı hâricinde Yoğurtçu sokağında vâki‘ ma‘lûmü’l-hudûd bir bâb Zeyt yağcı mağazası derûnunda mevcûde akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan beyne’l-esnâf gedik ta‘bîr olunur bir kantar ve bir terâzî ma‘a derâhim ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bât-ı sahîh-i şer‘î ve safka-i vâhide ile iki bin guruşa mezbûr Odunkapılı Mehmed Yazıcı’ya bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm iki bin guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim kat‘a alâka ve medhalim kalmayup mezbûr Odunkapılı Mehmed Yazıcı’nın emvâl-i müşterâtı ve hakk-ı sırfı olmuşdur dedi dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 17 Ra sene [1]238. Şühûdü’l-hâl: Zeyt Yağcılar Kethudâsı el-Hâc Hüseyin Ağa b. Hasan, İsmail Yazıcı b. Mehmed, es-Seyyid Mehmed Emin Ağa b. Ali.