Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 328 Hüküm no: 359 Orijinal metin no: [56a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mehmed b. Abdullah’ın vârislerinin aralarında anlaşarak birbirlerinin zimmetlerini ibrâ ettikleri Fi’l-asl vilâyet-i Rumeli’nde Saray kazâsına tâbi‘ Ayvacık nâm karye ahâlîsinden olup mahmiye-i İstanbul’da Dîvâne Ali mahallesinde sâkin iken bundan akdem vefât eden el-Hâc Mehmed b. Abdullah nâm kimesnenin verâseti zevce-i metrûkesi Ayşe bt. Abdullah nâm hâtun ile usûbet-i nesebiyye cihetinden li ebeveyn ammi oğlu Ahmed b. Abdullah nâm kimesneye münhasıra olduğu şer‘an zâhir ve müte‘ayyin oldukdan sonra mezbûr Ahmed tarafından husûs-ı âti’z-zikre vekîl olduğu yedinde olan mazmûnu müsbit hüccet-i şer‘iyye nâtıka olduğu üzre şer‘an sâbit olan Hüseyin Çelebi b. İbrahim meclis-i şer‘-i şerîf-i enverde müteveffâ-yı mezbûrun kızı Fâtıma’nın kızı Ümmügülsüm nâm sagīrenin babası ve velîsi Mehmed Ağa b. Nuh mahzarında bi’l-vekâle ikrâr ve takrîr-i kelâm edip mezbûr el-Hâc Mehmed mukaddemâ fevt oldukda müvekkilim mezbûr Ahmed âhar diyârda bul[un]mağla müteveffâ-yı mezbûrun verâseti zevcesi mezbûre Ayşe ile sagīre-i mezbûreye isâbet etmek zu‘muyla müteveffâ-yı mezbûrun terekesinden ve zimem-i nâsda olan hukūkundan mezbûr Mehmed Ağa yüz yirmi sekiz bin yüz altmış bir akçe bi’l-velâye ahz u kabz eyledikden sonra işbu bin doksan yedi senesi şehr-i Rebî‘ulâhir’inin üçüncü günü müvekkilim merkūm Ahmed gelip meblağ-ı mezbûr yüz yirmi sekiz bin yüz altmış bir akçeyi merkūm Ahmed Ağa’dan taleb ve da‘vâ ve ba‘de’l-münâza‘a altmış bin akçeye sulh ve kabz-ı bedel ve tereke-i müteveffâ-yı mezbûrdan husûsuna müte‘allika da‘vâdan sagīre-i mezbûre ve merkūm Mehmed Ağa’nın zimmetlerini ibrâ ve iskāt etmiş idi lâkin müteveffâ-yı mezbûrun gāib ani’l-meclis Tavil Mehmed Beşe zimmetinde olan yüz guruş hakkından ber vech-i muharrer sagīre-i mezbûre vâris olmak üzre ba‘de’s-sulh sen altmış dokuz guruş kabz eyledin deyû meblağ-ı mezbûr altmış dokuz guruşu mezbûr Mehmed Ağa’dan bi’l-vekâle taleb ve da‘vâ eylediğimde ol dahi cevâbında meblağ-ı mezbûr altmış dokuz guruşu merkūm Tavil Mehmed Beşe’den kable’s-sulh ahz edip meblağ-ı mezbûr bâlâda zikr olunan yüz yirmi sekiz bin yüz altmış bir akçede dâhildir demekle husûs-ı mezbûru vukūf-ı tâmmı olan müslimînden suâl dahi eylediğimde ber vech-i muharrer kable’s-sulh ahz edip bâlâda zikr olunan meblağda dâhil idiği ma‘lûmum olmağla husûs-ı mezbûra müte‘allika âmme-i da‘vâdan mezbûre ile merkūm Mehmed Ağa’nın zimmetlerini ibrâ-i âmm-ı kātı‘ü’n-nizâ‘la bi’l-vekâle ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: Mehmed Efendi b. Muharrem, Abdullah Çelebi b. el-Hâc Murad, Ahmed Efendi b. Veli, Mehmed Beşe b. Şaban, Osman Efendi b. Şaban, İbrahim Çavuş b. Ali, İbrahim Çelebi b. Abdullah, el-Hâc Mustafa b. Tevekkül, el-Hâc Yusuf b. Ahmed.