Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 329 Hüküm no: 360 Orijinal metin no: [56b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Ramazan’ın Fâtıma bt. Hamza aleyhine açtığı davanın zaman aşımı sebebiyle reddi Min mümzâtihî Mahmiye-i İstanbul’da Mustafa Paşa-yı Atîk hamamının sâbıkan müste’ciri olan Mehmed Bey b. Ramazan el-Yesârî saray-ı kāimmakām-ı hazret-i sadr-ı a‘zamîde ma‘kūd meclis-i şer‘-i hatîr-i lâzımü’t-tevkīrde yine mahmiye-i mezbûrede Acem Ağa mahallesinde sâkine sâhibetü hâzihi’l-vesîka Fâtıma bt. Hamza nâm hâtunun zevci ve tarafından husûs-ı âti’l-beyâna vekîl olup hasm-ı câhid-i şer‘î muvâcehesinde nehc-i şer‘î ve tarîk-i mer‘î üzre şer‘an vekâleti sâbite olan el-Hâc Mustafa b. Hasan mahzarında üzerine da‘vâ ve takrîr-i kelâm edip bin yetmiş altı senesinde ben hamam-ı mezbûru istîcâr eylediğimde müvekkile-i mezbûre Fâtıma Hâtun hamam-ı mezkûrda mülkü olan ma‘lûmü’l-mikdâr odun ve peştamal ve sâir hamam esvâbını iki bin beş yüz guruşa bana bey‘ ve teslîm ben dahi iştirâ ve teslîm-i semen eylediğimden sonra ben dahi bir mikdâr zamândan sonra eşyâ-i mezbûru yine mezbûr Mehmed Bey’in dâmâdı olan Mehmed nâm kimesneye bey‘ ve teslîm etmişidi[m] lâkin eşyâ-i mezkûrenin hîn-i iştirâmda kıymeti ancak altmış bin akçe iken bana iki bin beş yüz guruşa bey‘i semen-i fâhiş ile olmağın vekîl-i mezbûra suâl olunup eşyâ-i mezkûrenin kıymeti olan altmış bin akçeden ziyâdeyi müvekkile-i mezbûre bana red ve teslîm etmek üzre tenbîh olunması matlûbumdur dedikde müdde‘î-i mezbûrun iştirâ eylediği eşyânın mecmû‘u müstehleke olup tağrîr hafî olmadığından mâ‘adâ müdde‘î-i mezbûr yirmi bir sene bilâ-özr-i şer‘î sükût eylediğini mu‘terif olmağla ol mikdâr zamân bilâ-özr terk olunan da‘vânın bilâ-emrin istimâ‘ı memnû‘ olduğundan gayrı mezbûrun bir vechile da‘vâsı istimâ‘a sâlih olmamağın mezkûr Mehmed Bey bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sânî min şehri Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Ali Çavuş el-Mübâşir, el-Hâc Sâlih el-Mübâşir, el-Hâc Halil b. Mehmed, el-Hâc İbrahim b. Mehmed, Ömer Ağa Kethüdâ-yı hamamiyân.