İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 167 Hüküm no: 133 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Câsus Ahmed Beşe’nin kuruyemişci dükkânını oğlu Seyyid Hasan Efendi b. Seyyid Mahmud’a sattığı Kuruyemişci Vilâyet-i Anadolu’da Alâiye kazâsına tâbi‘ Simyan karyesi ahâlisinden olup hâlâ mahmiye-i İstanbul’da Süleymâniye Câmi‘-i şerîfi kurbünde Kâtib Şemseddin mahallesinde müsâfireten sâkine ve zâtı kazâ-i mezbûr ahâlisinden Topaloğlu İbrahim Beşe b. Mehmed ve es-Seyyid Hasan Beşe b. Mustafa ve Süleyman Efendi b. Mahmud nâm kimesneler ta‘rîfleriyle mu‘arrefe olan Âişe Hatun bt. Câsus Ahmed Beşe meclis-i şer‘-i hatîr-i lâzımü’t-tevkīrde sadrî kebîr oğlu işbu bâ‘isü’l-kitâb es-Seyyid Hasan Efendi b. es-Seyyid Mahmud nâm kimesne mahzarında ikrâr-ı tam ve takrîr-i kelâm edip mahmiye-i mezbûrede Zindân kapısı hâricinde Yemiş İskelesi’nde Tahtaüzeri nâm mahâlde vâki‘ Kürdoğlu ve Kalyoncu dükkânları beynlerinde kâin İmâmoğlu dükkânı demekle şehîr ma‘lûmü’l-hudûd üç kepenk bir bâb kuruyemişci dükkânı derûnunda mevcûde akd-i âtiyyü’z-zikrin sudûruna değin yedimde mâlım ve mülküm [olan] beyne’l-esnâf gedik ta‘bîr olunur âlât-ı lâzıme-i ma‘lûmemin nısfını yedimde ibkā ve nısf-ı âharını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bin beş yüz guruşa oğlum mezbûr es-Seyyid Hasan Efendi’ye bey‘ ve temlik ve teslîm eylediğimde [33a] ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin beş yüz guruşu bana def‘ ü teslîm eylediğinde ben dahi yedinden ahz ü kabz ve umûruma sarfla istihlâk edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrenin nısf-ı şâyi‘ında benim kat‘a alâka ve medhalim kalmayup ber-minvâl-i muharrer oğlum merkūm es-Seyyid Hasan Efendi’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 18 Ra sene [1]238. Şühûdü’l-hâl: Kethudâ Mustafa Ağa, es-Seyyid el-Hâc Ahmed Ağa, el-Hâc Veliyüddin Ağa, Süleyman Efendi, Hasan Efendi, Ali Yazıcı, Yiğitbaşı Mustafa Ağa.