İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 168 Hüküm no: 134 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun bt. Mehmed b. Abdullah’ın bakkal dükkânını Şerife Cemile Hatun bt. Mehmed’e sattığı Bakkāl Mahmiye-i İstanbul’da Üskübî mahallesi sâkinlerinden Rukiye Hatun bt. Mehmed b. Abdullah tarafından husûs-ı âti’l-beyânı ikrâra vekîl olduğu bi’l-ma‘rifeti’ş-şer‘iye zâtını ârifân Gül Câmi‘i müezzini es-Seyyid Yahya Efendi b. Hasan ve es-Seyyid Mustafa Efendi b. Mehmed nâm kimesne şehâdetleriyle ber-nehc-i şer‘î sâbit olan es-Seyyid Abdülhamid Ağa b. es-Seyyid Ahmed nâm kimesneler meclis-i şer‘-i hatîr-i lâzımü’t-tevkīrde zâtı ta‘rîf-i şer‘î ile mu‘arrefe olan işbu bâ‘isü’l-kitâb Şerîfe Cemile Hatun bt. Mehmed mahzarında bi’l-vekâle ikrâr-ı tam ve takrîr-i kelâm edip müvekkilem mezbûre Rukiye Hatun mahmiye-i İstanbul hısnı ebvâbından Ayakapısı hâricinde vâki‘ bostancıbaşı dükkânı demekle ma‘rûf ma‘lûm[ü’l-hudûd] bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle yetmiş sehm bir pul hissesi Bakkāl Ligori ve karındaşı Sava v. Kiryako nâm zimmîlerin ve kırk yedi sehm üç pul hissesi benim ve yine bâb-ı mezkûr hâricinde kâin Papasoğlu dükkânı demekle arîf ma‘lûmü’l-hudûd diğer bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle yirmi sehmi mesfûrân Ligori ve Sava zimmîlerin ve yüz sehmi benim yedimizde iştirâken mâlımız ve mülkümüz olmağın ben zikr olunan Bostancıbaşı dükkânı âlât-ı lâzımesinden ber-i‘tibâr-ı merkūm akd-i âti’z-zikrin sudûruna değin benim yedimde mâlım ve mülküm olan kırk yedi sehm üç pul hisse-i şâyi‘amın yirmi sehmini yedimde ibkā etmemle mâ‘adâ yirmi yedi sehm üç pul hissem ile sâlifü’z-zikr Papasoğlu dükkânı âlât-ı lâzımesinden ber-i‘tibâr-ı mezkûr yedimde mâlım olan yüz sehm hisse-i şâyi‘amın kezâlik yirmi sehmini yedimde ibkā etmemle mâ‘adâ seksen sehm hissem tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleri ve şerîklerim mesfûrânın izin ve icâzetleriyle iki bin guruşa mezbûre Şerîfe Cemile Hatun’a bey‘ ve temlik ve vech-i lâyıkı üzere teslîm eylediğimde ol dahi ber-vech-i muharrer yedimden iştirâ ve temellük ve tesellüm ve kabz ü kabûl ve semenleri olan meblağ-ı mezbûr iki bin guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘ayn-i mezkûreynin tağrîr ve gabinlerine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan Bostancıbaşı dükkânı âlât-ı lâzımesinden ber-i‘tibâr-ı mezkûr ancak yirmi yedi sehm üç pul ve sâlifü’l-beyân Papasoğlu dükkânı âlât-ı lâzımesinden kezâlik ber-i‘tibâr-ı merkūm ancak seksen sehm hisse-i şâyi‘alarında benim kat‘a alâka ve medhalim kalmayup mezbûre Şerîfe Cemile Hatun’un emvâl-i müşterâtı ve hakk-ı sırfı olmuşdur dedi dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 20 Ra sene [1]238. Şühûdü’l-hâl: Pazarbaşı Süleyman Ağa, Kâtib Ahmed Efendi, Bölükbaşı Molla Abdi.