İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 174 Hüküm no: 140 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Örücü esnafından Ali Ağa b. Mehmed’in örücü dükkânını İbrahim Edhem Ağa b. Süleyman’a sattığı Örücü gediği mübâya‘ası Mahmiye-i İstanbul’da kâin örücü esnâfından Ali Ağa b. Mehmed nâm kimesne meclis-i şer‘-i hatîr-i lâzımü’t-tevkīrde yine esnâf-ı merkūmeden işbu bâ‘isü’l-kitâb İbrahim Edhem Ağa b. Süleyman mahzarında ikrâr ve takrîr-i kelâm edip mahmiye-i mezbûrede Mercan kurbünde uncular sûkunda vâki‘ elli altı mütevellîsi Mehmed Sadık ve Uncu Hüseyin Ağa dükkânları beynlerinde kâin bir bâb örücü dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin nısfı merkūm İbrahim Edhem Ağa’nın mâlı olmağla mâ‘adâsı olup akd-i âti’z-zikrin sudûruna değin yedimde mâlım ve mülküm olan nısf-ı âharını dahi ben tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile iki bin guruşa mezbûr İbrahim Edhem Ağa’ya bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm iki bin guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan örücü gediği ta‘bîr olunur âlât-ı lâzıme-i ma‘lûmede benim kat‘a alâka ve medhalim kalmayup nısfı mukaddemâ ve nısf-ı âharı hâlâ ber-minvâl-i muharrer şirâen ki mecmû‘u mezbûr İbrahim Edhem Ağa’nın mâlı ve mülkü ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 4 R sene 1238. Şühûdü’l-hâl: Kethudâ Mehmed Ağa, Yiğitbaşı Yakub Ağa, Mütevellî Mehmed Sadık Ağa, Hüseyin Ağa, el-Hâc Mehmed Ağa, Ali Ağa, İbrahim Ağa.