İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 175 Hüküm no: 141 Orijinal metin no: [34b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yuvakim v. Yorgi’nin manav dükkânını İbrahim Beşe b. Osman’a sattığı Manav gediği Mahmiye-i İstanbul’da kâin manav esnâfından Yuvakim v. Yorgi nâm zimmî meclis-i şer‘-i hatîr-i lâzımü’t-tevkīrde yine esnâfından işbu bâ‘isü’l-kitâb İbrahim Beşe b. Osman nâm kimesne mahzarında ikrâr-ı tam ve takrîr-i kelâm edip mahmiye-i Zindân kapısı hâricinde Çardak kurbünde vâki‘ ma‘lûmü’l-hudûd bir bâb manav dükkânı derûnunda mevcûde beyne’l-esnâf gedik ta‘bîr olunur iki kantar ve beş küfe ve dört tabla ve bir akçe tahtası ve sâir âlât-ı lâzıme-i ma‘lûmenin nısfı âharın mâlı olmağla mâ‘adâsı olup akd-i âti’z-zikrin sudûruna değin yedimde mâlım ve mülküm olan ben tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile ve şerîk-i âharın izniyle üç bin beş yüz guruşa mezbûr İbrahim Beşe’ye bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç bin beş yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan manav dükkânı derûnunda mevcûde gedik ta‘bîr olunan âlât-ı lâzımenin nısf-ı şâyi‘ında benim kat‘a alâka ve medhalim kalmayup mezbûr İbrahim Beşe’nin mâl-ı müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 13 Ra sene 1238. Şühûdü’l-hâl: Yaşyemiş Pazarbaşısı es-Seyyid İbrahim Sârım Bey, Bölükbaşı Musa Yazıcı, Manav Hüseyin Beşe b. Osman.