İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 175 Hüküm no: 142 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarfanos v. Dimitri’nin aşçı, kebabçı ve hoşafçı dükkânı gediğini Anderya v. Mıgırdıç’a sattığı Mahmiye-i İstanbul’da kâin zahîreci tâifesinden Tarfanos v. Dimitri nâm zimmî meclis-i şer‘-i hatîr-i lâzımü’t-tevkīrde tütüncü esnâfından işbu hâmilü’r-rakīm Anderya v. Mıgırdıç nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûrede Balık Pazarı Kapısı hâricinde vâki‘ gözlemeci ve aşçı dükkânları beynlerinde kâin bir bâb aşçı ve kebâbçı ve hoşâbçı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle seksen sehm âharların mâlları olmağla mâ‘adâsı olup akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan kırk sehmini ben tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile ve âhar şerîkim izin ve icâzetleriyle beş bin iki yüz guruşa mesfûr Anderya zimmîye bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm beş bin iki yüz guruşu bana def‘ ü teslîm eylediğinde ben dahi yedinden ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt dahi etmemizle fîmâ-ba‘d zikr olunan âlât-ı lâzıme-i ma‘lûmeden ber-i‘tibâr-ı merkūm kırk sehminde benim kat‘a alâka ve medhalim kalmayup mesfûr Anderyas zimmînin mâl-ı müşterâsı ve hakk-ı sırfı olmuşdur dedikde [gıbbe’t-tasdîki’ş-şer‘î mâ-vaka‘a bi’t-taleb ketb olundu.] Fî 6 R sene 1238. Şühûdü’l-hâl: Başyemiş Pazarbaşısı İbrahim Sârım Bey, Bölükbaşı Musa Yazıcı, Molla Halil el-Muhzır, Anaştaş v. İlya, Yuvaniyos v. Kostandi, Bakkāl Düğenci v. Abraham, Bakkāl Çakıroğlu Yorgi v. İstavriyanos