Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 330 Hüküm no: 361 Orijinal metin no: [56b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Beşe’nin Sultan Bayezid Vakfı’na ait Edirne’deki arsalar ve kiremithanedeki tasarruf hakkını Abdullah Efendi’ye devrettiği Esirci tâifesinden olup mahmiye-i İstanbul’da Zeyrek kurbunda sâkin İbrahim Beşe b. Halil nâm kimesne meclis-i şer‘-i şerîf-i enverde Başmuhâsebe halîfelerinden bâ‘isü hâze’l-kitâb Abdullah Efendi b. Veli mahzarında ikrâr ve takrîr-i kelâm edip mezbûr Abdullah Efendi’ye yedimde olan temessükler nâtık olduğu üzre merhûm Sultan Bayezid Hân -tâbe serâhû- evkāfından olup mahrûse-i Edirne’de Kemikburnu demekle ma‘rûf mevzi‘de vâki‘ lede’l-ahâlî ma‘lûmü’l-hudûd at pazarı deverân yirmi dönüm arsa icâreteyn-i ma‘lûmeteyn ile tasarrufumda olmağla arsa-i merkūmeyi ve yine vakf-ı mezbûrdan tasarrufumda olup mahrûse-i merkūmede Yalıköprü demekle ma‘rûf cisr altında vâki‘ ma‘lûmü’l-hudûd kiremidhâne ve dört dönüm arsa-i hâliyeyi bi safkatin vâhidetin izn-i mütevellî ile yedi yüz esedî guruş bedel mukābelesinde ferâğ ve tefvîz ve mahallinde kabza taslît edip ol dahi ber vech-i muharrer tefevvüz ve kabûl ettikden sonra mezbûr Abdullah Efendi bedel-i merkūm yedi yüz guruşu yedinde olan hüccet nâtıka olduğu üzre cihet-i kefâletden zimmetimde hakkı olan iki bin iki yüz otuz guruşun yedi yüz guruşuna takās, ben dahi mukāssa ve kabûl eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer min Recebi’l-mürecceb li sene seb‘a ve tis‘în ve elf. Şuhûdü’l-hâl: Mustafa Ağa Ser-muhzırân, Mustafa Çelebi Kethüdâ-yı muhzırân, el-Hâc Mustafa b. Tevekkül, İbrahim Çelebi b. Ahmed ve gayruhüm.