İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 176 Hüküm no: 143 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafından Dimo v. İstefan’ın, Kostandi v. İstefan ve Yorgaki v. Anderya’nın zimmetlerini ibra ettiği Yağcı bakkāl <> Asl-ı hüccet târihi fî 21 Ramazan sene [12]21. İşbu hüccetin sâhibi bakkāl tâifesinden Dimo v. İstefan nâm zimmî meclis-i şer‘-i hatîr-i lâzımü’t-tevkīrde yine tâife-i merkūmeden derûn-ı hüccetde isimleri mastûr kendi nefsinden asıl ve şerîki Kostandi v. İstefan zimmî tarafından husûs-ı âtide tasdîka vekîl olduğu Pazarbaşı Süleyman Ağa b. Ömer ve Bölükbaşı Abdi Ağa b. Mehmed nâm kimesneler şehâdetleriyle sâbit olan Yorgaki v. Anderya zimmî muvâcehesinde ikrâr-ı tam ve takrîr-i kelâm derûn-ı hüccetde tafsîl ve beyân olunduğu üzere benim zimmîyân-ı şerîkân-ı mersûmân zimmetlerinde bin iki yüz otuz senesi şehr-i Ramazani’l-mübâreki’nin yirmi birinci günü yedimden ve mâlımdan bi’l-ma‘iye istidâne ve kabz eyledikleri iki bin guruşu ve semeni târih-i mezkûrdan iki sene tamamına değin müeccel ve mev‘ûd yedimden ve mâlımdan iştirâken iştirâ ve kabz eyledikleri iki aded çârşâl semeninden dahi altı yüz guruş ki ciheteyn-i mezkûreteynden cem‘an alacak hakkım olan iki bin altı yüz guruşun altı yüz guruşunu mukaddemâ ve iki bin guruşunu bu def‘a bana edâ ve teslîm ben dahi yedlerinden tamamen ve kâmilen ahz ü kabz ve mukābelesinde mersûmânın mâlları olup yedimde rehin olan mahmiye-i İstanbul hısnı ebvâbından Zindân kapısı hâricinde Yoğurtçu sokağı nâm mahâlde Ahî Çelebi Câmi‘-i şerîfi civârında vâki‘ taş mahzen demekle arîf bir bâb yağcı bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmeden yüz yirmi sehm i‘tibâriyle doksan sehm hisse-i şâyi‘alarını rehniyetden ba‘de’l-fekk mâlikleri mersûmâna red ve teslîm ve her birimiz âhar yedinden ahz ü kabz edip min-ba‘d meblağ-ı mezkûrdan zimmîyyân-ı mersûmân zimmetlerinde bir akçe ve bir habbe hakkım ve âlât-ı lâzıme-i mezkûreden dahi kat‘a alâka ve medhalim kalmayup ke’l-evvel zimmîyyân-ı mersûmânın mâlları dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 21 M sene 1238. Şühûdü’l-hâl: Odunkapısı Kethudâsı Ömer Ağa, Pirinçci es-Seyyid Mustafa Ağa, el-Hâc Kādir Efendi, Pirinçci el-Hâc Mehmed Ağa, Uncu Kürd Halil Ağa, Pirinçci Kürd Mustafa Ağa, Yağ-ı zeyt Kethudâsı el-Hâc Hüseyin Ağa, Yağcı el-Hâc Ebûbekir Ağa, Yağcı Poladoğlu Molla Osman, Yağcı es-Seyyid Mehmed Tâhir Ağa, Yağcı Rizeli Osman Ağa ve gayruhum.