İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 177 Hüküm no: 144 Orijinal metin no: [35a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostandi v. Yorgi v. Adami’nin simitçi ve çörekçi fırını gediğini Nikola v. Dimo’ya sattığı Edirnekapısı’nda Simidci ve çörekçi Mahmiye-i İstanbul’da kâin simidci ve çörekçi esnâfından Kostandi v. Yorgi v. Adami nâm zimmî tarafından husûs-ı âti’l-beyânda vekîl olduğu Yiğitbaşı Mehmed Usta b. Osman ve Yazıcı Ali Efendi b. Süleyman nâm kimesneler şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hâkim-i [hükm-i] şer‘î lâhık olan esnâf-ı mezkûre kethudâsı İbrahim b. Mustafa meclis-i şer‘-i hatîr-i lâzımü’t-tevkīrde esnâf-ı merkūmeden işbu hâmilü’r-rakīm Nikola v. Dimo nâm zimmî muvâcehesinde Dimo v. Apostol nâm zimmî hâzır olduğu hâlde bi’l-vekâle ikrâr-ı tam ve takrîr-i kelâm edip mahmiye-i mezbûre << İstanbul >> hısnı ebvâbından Edirkapısı dâhilinde Acıçeşme nâm mahâlde vâki‘ ma‘lûmü’l-hudûd bir bâb simidci ve çörekçi fırını derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi âharın mâlı olmağla mâ‘adâsı olup akd-i âti’z-zikrin sudûruna değin müvekkilim mersûm Kostandi zimmînin yedinde mâlı ve mülkü olan altmış sehm-i şâyi‘ını ben bi’l-vekâle tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîkim âharı izin ve icâzetiyle iki bin guruşa mesfûr Nikola zimmîye bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ [-ı merkūm] iki bin guruşu bana def‘ ü teslîm ben dahi yedinden tamamen ve kâmilen ahz ü kabz ettikden sonra semen-i merkūm iki bin guruşun bin guruşunu müvekkilim mersûmun emriyle hâzır-ı mesfûr Dimo zimmîye ve bin guruşunu yine müvekkilim mesfûrun emriyle gāibûn ani’l-meclis dâyinleri olan Uncu Ahmed Ağa nâm kimesne ile Asvador ve Ohannes zimmîlere edâ ve teslîm eylediğimde onlar dahi yedimden kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile bi’l-vekâle ve bi’l-vesâye kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrenin altmış [sehm hisse-i] şâyi‘ında müvekkilim mersûm Kostandi zimmînin kat‘a alâka ve medhali kalmayup mesfûr Nikola zimmînin mâl-ı müşterâsı ve hakk-ı sırfı olmuşdur dedikde vekîl-i merkūmun bi’l-cümle takrîr-i meşrûhunu hâzır-ı mesfûr ile mersûm Nikola zimmî tasdîk etmeleriyle mâ-vaka‘a bi’t-taleb ketb olundu. Fî 11 R sene 1238. Şühûdü’l-hâl: Nişâncılı el-Hâc Mehmed Ağa, Nişâncılı Ahmed Ağa, Yusuf Paşa Çeşmeli el-Hâc Mustafa Ağa ve gayruhum.