İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 178 Hüküm no: 145 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Mıgırdıç’ın yerine oğlu Ohannes’in zernişancı ustası olduğu Zernişâncı Mahmiye-i İstanbul’da kâin hakkāk esnâfına merbût bâ-fermân-ı âlî yirmi nefer zernişâncı ustalarından Kirkor v. Mıgırdıç nâm zimmî meclis-i şer‘-i hatîr-i lâzımü’t-tevkīrde sulbî kebîr oğlu olup zernişâncılık san‘atında mahâret tahsîl eden işbu hâmilü’r-rakīm Ohannes zimmî muvâcehesinde bi-tav‘ihi ikrâr-ı tam ve takrîr-i kelâm edip bâlâda tahrîr olunduğu üzere mahmiye-i mezbûrede vâki‘ hakkāk esnâfına mülhak bâ-fermân-ı âlî şurût-ı nizâma merbût yirmi nefer zernişâncılık ustalığından mutasarrıf olduğum zernişâncılık ustalığımı hüsn-i rızâ ve tayyib-i hâtırım ve ferâğ-ı mu‘teber-i kat‘î ile oğlum mesfûra ferâğ ve tefvîz ve mahmiye-i mezbûrede Fincancılar Hân’ında müsteciri olduğum odada mevcûde ustalığıma merbût olarak i‘mâl eylediğim bir destgâh ma‘a çarh ve bir kemâne ve bir örs ve bir çekiç ve beş kalem ve bir mıskala ve sâir zernişâncı âlât-ı lâzımemi tarafeynden bi’l-îcâb ve’l-kabûl bâtten ve sahîhan safka-i vâhide bin beş yüz guruş semen-i makbûza yine mesfûr Ohannes zimmîye bey‘ ve temlik ve teslîm eylediğimde ol dahi ba‘de’l-iştirâ ve’l-kabz tağrîr ve gabnine müte‘allika âmme-i da‘vâdan her birimiz âharın zimmetini kabûlü hâvî ibrâ ve iskāt dahi etmemizle fîmâ-ba‘d zikr olunan zernişâncı ustalığımı oğlum mesfûr Ohannes zimmînin hakk-ı mufavvazı ve eşyâ-i muharrere-i mezkûre mâl-ı müşterâsı olup benim kat‘a alâka ve medhalim kalmamışdır dedikde gıbbe’t-tasdîki’l-mu‘teber mesfûr Ohannes zimmî babası fâriğ-i mesfûrun yerine zernişâncı ustası olup şurût-ı nizâmlarına mugāyir hareket etmemek üzere ta‘ahhüd etmeğin mâ-vaka‘a bi’t-taleb ketb olundu. Fî-selh-i Ra sene 1238 Şühûdü’l-hâl: Hakkāklar Kethudâsı Mehmed Şakir Efendi, Molla Hüseyin el-Muhzır, Yiğitbaşı Mehmed Emin Ağa, Ustabaşı İpek v. ( ), Lazar v. ( ), Artin v. ( ), Antranik v. ( ).