İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 184 Hüküm no: 152 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı esnafından Ademzade çırağı Seyyid Mehmed b. Hüseyin’in mâlik olduğu sandalcı destgâhını Hasan Usta b. Mehmed’e sattığı Sandalcı Hudâvendigâr-ı esbak cennet-mekân firdevs-âşiyân merhûm Sultan Selim Han -tâbe serâhû- hazretlerinin medîne-i Üsküdar[‘da] vâki‘ Selîmiye ismiyle müsemmâ câmi‘-i şerîfleri evkāfına merbût sandalcı destgâhlarından Âsitâne-i aliyye ve bilâd-ı selâse ve tevâbi‘lerinde vâki‘ bi’l-cümle sandalcı destgâhlarının bey‘ ü şirâ ve mu‘âmelât-ı sâiresi hüccetleri İstanbul mahkemesinden gayri mehâkimde takrîr ü tahrîr ve bir aded destgâh iki yüz guruşdan ziyâde semen ile bey‘ ve şirâ olunmak bâ-emr-i âlî memnû‘ [olduğu] şurût-ı mer‘iyesinden olduğuna binâen sandalcı esnâf-ı merkūmeden Âdemzâde çırağı es-Seyyid Mehmed b. Hüseyin b. Abdullah nâm kimesneler şehâdetleriyle ber-nehc-i şer‘î sâbit olan diğer es-Seyyid Mehmed Ağa b. es-Seyyid Ali nâm kimesne meclis-i şer‘-i hatîr-i lâzımü’t-tevkīrde esnâf-ı mezkûreden bir aded destgâha mâlik olan işbu bâ‘isü’l-kitâb Hasan Usta b. Mehmed mahzarında bi’l-vekâle ikrâr-ı tam ve takrîr-i kelâm edip müvekkilim mezbûr Âdemzâde çırağı es-Seyyid Mehmed zikr olunan destgâhlardan akd-i âti’z-zikrin [sudûruna] değin bâ-hüccet-i şer‘iye yedimde mâlım ve mülküm olan bir aded destgâhımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile iki yüz guruşa mezbûr Hasan Usta’ya bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm iki yüz guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan bir aded destgâhda benim kat‘a alâka ve medhalim kalmayup mezbûr Hasan Usta’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 18 R sene 1238. Şühûdü’l-hâl: Kethudâ es-Seyyid el-Hâc Hafız Mehmed Emin Ağa, Mehmed Usta, Yiğitbaşı Ebûbekir Ağa.