Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 331 Hüküm no: 362 Orijinal metin no: [56b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Papa Kevork v. Mardiros’un ölen başpapaz Devlet v. Agop’un terekesinden hisse isteğinin reddi Min mümzâtihî Mahmiye-i İstanbul’da Meryem Ana kilisesi demekle ma‘rûfe kilise papazlarından olup zikri âtî da‘vâya kıbel-i şer‘den me’zûn olan Papa Kevork v. Mardiros meclis-i şer‘-i şerîf-i enverde hâlâ başpapazları olan Nişancı mahallesinde sâkin iken bundan akdem hâlik olan Devlet v. Agop nâm Ermeni mukaddemâ hasta ve sâhib-i firâş oldukda helâkinden sonra cemî‘ malının sülüsünü ifrâz ve kilise-i mezkûre avârızına ve kürekçi bedeline ve bir mikdârı dahi kilise-i mezkûre fukarâsına tevzî‘ oluna deyû vasiyyet edip tenfîze mezbûr Papa Haçador’u vasiyy-i muhtâr nasb ve ta‘yîn edip musırran alâ îsâ’ihî hâlik olup sülüs malı elli kîseye bâliğ ve mezkûr Papa Haçador dahi vesâyet-i mezbûreyi kabûl etmeğin hâlâ suâl olunup kilise-i mezkûre fukarâsından olmağla meblağ-ı mezbûrdan benim hisseme isâbet eden mikdârı bana teslîme tenbîh olunması matlûbumdur dedikde gıbbe’s-suâl mezbûr Haçador husûs-ı mezbûru bi’l-külliye inkâr edicek müdde‘î-i mezbûrdan müdde‘âsına [mutâbık] beyyine taleb olundukda ityân-ı beyyine için istimhâl etmeğin mehil-i şer‘î birle imhâl [57a] olundukdan sonra bir hafta dahi mürûr edip ityân-ı beyyineye adem-i iktidârı nümâyân olduğundan mâ‘adâ Ermeni tâifesi papazlarından İsayi v. Ovanes ve Agop v. Küçük ve Arslan v. Totil ve Simaven v. Krankol ve Kirkor v. İhtiyar ve Ermeni tâifesinden Beyler v. Asvador ve Simon v. Dursun ve Abraham v. İhtiyar ve sâirleri mezbûr Papa Kevork mücerred celb-i mâl için bunun emsâli da‘vâdan hâli değildir deyû mezbûrun hilâf-ı vâki‘ da‘vâlara mütesaddî ve mübâşir olduğunu ihbâr etmeğin işbu vesîka hıfzan li’l-makāl ketb olundu. Fî gurreti Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Efendi b. Mustafa, Mustafa Çelebi b. Ahmed, Mustafa Çelebi b. Abdurrahman, el-Hâc Mustafa b. Tevekkül, Ali b. Bâli, Mehmed tâbi‘-i Hasan Ağa ve gayruhüm mine’l-huzzâr.