İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 193 Hüküm no: 162 Orijinal metin no: [38b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı esnafından Asvador v. Aleksan’ın mâlik olduğu sandalcı destgâhını Ohannes v. Anton’a sattığı Sandalcı aded 1 Hudâvendigâr-ı esbak cennet-mekân firdevs-âşiyân merhûm Sultan Selim Han -tâbe serâhû- hazretlerinin medîne-i Üsküdar’da vâki‘ Selîmiye ismiyle müsemmâ câmi‘-i şerîfleri evkāfına merbût sandalcı destgâhlarından mâ‘adâ Âsitâne-i aliyye ve bilâd-ı selâsede vâki‘ bi’l-cümle sandalcı destgâhlarının bey‘ ü şirâ ve mu‘âmelât-ı sâiresi hüccetleri İstanbul mahkemesinden gayri mehâkimde tahrîr ü takrîr ve bir aded destgâh iki yüz guruşdan ziyâde semen ile bey‘ ü şirâ olunmak bâ-emr-i âlî memnû‘ olduğu şurût-ı mer‘iyesinden olduğuna binâen sandalcı esnâfından Asvador v. Aleksan nâm zimmî meclis-i şer‘-i hatîr-i lâzımü’t-tevkīrde esnâf-ı mezkûreden işbu hâmilü’r-rakīm Ohannes v. Anton nâm zimmî muvâcehesinde ikrâr-ı tam ve takrîr-i kelâm edip bâlâda zikr ve beyân olunan destgâhlardan [39a] akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan bir aded destgâhımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mersûm Ohannes zimmîye iki yüz guruşa bey‘ ve temlik ve teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm iki yüz guruşu bana def‘ ü teslîm eylediğinde ben dahi yedinden ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan bir aded destgâhda benim kat‘a alâka ve medhalim kalmayup mersûm Ohannes zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 7 Ca sene 1238. Şühûdü’l-hâl: Kethudâ es-Seyyid el-Hâc Hafız Mehmed Emin Ağa, Yiğitbaşı Ebûbekir Ağa, Molla Halil el-Muhzır.