Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 331 Hüküm no: 363 Orijinal metin no: [57a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Selvi v. Dimitri’nin vârislerinin Sinan v. Kiragos’taki alacaklarını tahsili Fi’l-asl Anadolu’da medîne-i Kayseriye müzâfâtından Ağrı nâm karye ahâlîsinden olup bundan akdem hâlik olan Selvi v. Dimitri nâm zimmînin verâseti zevce-i menkûha-i metrûkesi Kıymeti bt. ( ) nâm ile sulbî kebîr oğlu Aslan ve sulbî sagīr oğlu Manos nâm zimmîlere münhasıra ve tashîh-i mes’elesi on altı sehimden olup sihâm-ı mezbûreden iki sehmi mezbûre Kıymeti’ye ve yedişer mezbûrân Aslan ve Manos’dan her birine isâbet eylediği şer‘an zâhir ve mübeyyen oldukdan sonra mezbûre Kıymeti kendi tarafından asâleten sagīr-i mezbûrun vâlidesi ve vasiyyesi olmağla vesâyeten ve mezbûr Aslan dahi asâleten meclis-i şer‘-i şerîfde medîne-i mezbûreye tâbi‘ Efke nâm karye ahâlîsinden olup mahmiye-i İstanbul’da Gedikpaşa mahallesinde tavattun eden Sinan v. Kiragos nâm zimmî muvâcehesinde her biri asâleten ve vesâyeten üzerine da‘vâ ve takrîr-i kelâm edip mûrisimiz hâlik-i mezbûrun mezbûr Sinan zimmetinde cihet-i karz-ı şer‘îden kırk esedî guruş hakkı olup kable’l-ahz hâlik olmağla suâl olunup meblağ-ı mezbûrun bize edâya tenbîh olunmak matlûbumuzdur dediklerinde gıbbe’s-suâl mezbûr Sinan cevâbında fi’l-hakīka hâlik-i mezbûra ber vech-i muharrer cihet-i mezbûreden kırk esedî guruş deynim olup lâkin hâlik-i merkūma sıhhatinde def‘ ve teslîm eyledim deyû def‘le mukābele edicek gıbbe’l-istintâk ve’l-inkâr mezbûr Sinan’dan def‘-i mezbûruna beyyine taleb olundukda ityân-ı beyyineden izhâr-ı acz ve istihlâf etmeğin mezbûrân Kıymeti ve Aslan’a mûrisleri hâlik-i mezbûr hayâtında meblağ-ı mezbûru ahz u istîfâ veya âhara havâle veya bir tarîk ile mezbûr Sinan’ın zimmetini ibrâ eylediğini bilmediklerine yemîn [teklîf] olundukda mezbûr Aslan nükûl edip mezbûr[e] Kıymeti yemîn billâhi’llezî enzele’l-İncîle alâ İsâ -aleyhi’s-selâm- edip sagīr-i mezbûr dahi mevkūfen ale’l-yemîn mûcebiyle meblağ-ı mezbûrdan dokuz sehim hisselerine isâbet eden yirmi iki buçuk guruşu asâleten ve vesâyeten mezbûre Kıymeti’ye edâ ve teslîme mezbûr Sinan’a tenbîh olunup mâ vaka‘a bi’t-taleb ketb olundu. Fî gurreti Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Mustafa b. Tevekkül, İbrahim Çelebi [b.] Ahmed, Mehmed b. İdris, Mustafa, Şaban, Süleyman Çelebi.