İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 199 Hüküm no: 167 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden sandalcı esnafından Halebli Ceyor v. Anton’un mâlik olduğu yedi adet sandalcı destgâhını vârislerinin Karabet v. Mardıros’a sattığı 7 aded sandalcı gediği iki meclis olarak 1.400 guruşa mübâya‘a Hudâvendigâr-ı esbak cennet-mekân firdevs-âşiyân merhûm Sultan Selim Han -tâbe serâhû- hazretlerinin medîne-i Üsküdar’da vâki‘ Selîmiye ismiyle müsemmâ câmi‘-i şerîfleri evkāfına merbût sandalcı destgâhlarından mâ‘adâ Âsitâne-i aliyye ve bilâd-ı selâse ve tevâbi‘lerinde vâki‘ bi’l-cümle sandalcı destgâhlarının bey‘ ü şirâ ve mu‘âmelât-ı sâiresi hüccetleri İstanbul mahkemesinden gayri mehâkimde tahrîr ü takrîr ve bir aded destgâh iki yüz guruşdan ziyâde semen ile bey‘ ü şirâ olunmak bâ-emr-i âlî memnû‘ olduğu şurût-ı mer‘iyesinden olduğuna binâen sandalcı esnâfından olup zikr olunan yedi aded destgâha mâlik iken bundan akdem hâlik olan Halebli Ceyor v. Anton nâm zimmînin verâseti zevce-i metrûkesi Varvat bt. Mardıros nâm Nasrâniye ile sulbiye kebîre kızı Antoniya ve sulbiye sagīre kızları Maziçe ve Rezerbe ve sulbî sagīr oğulları Anton ve Corci’ye ba‘de’l-inhisâr sıgār-ı mersûmûnun ve anaları ve tesviye-i emirlerine bâ-hüccet-i şer‘iye vasî-i mansûbeleri olup şahsı ta‘rîf-i şer‘î ile mu‘arrefe olan zevce-i mersûme Varvat Nasrâniye ve mersûme Antoniya Nasrâniyenin zevci ve tarafeynden husûs-ı âti’z-zikrde vekîl olduğu şahs-ı mersûmeyi bilir Kethudâ es-Seyyid el-Hâc Mehmed Emin Ağa b. es-Seyyid Mustafa ve Yiğitbaşı Ebûbekir Ağa b. Ali nâm kimesneler şehâdetleriyle ber-nehc-i şer‘î sâbit olan Sandalcı Tarosu v. Sahak nâm zimmî hâzır olduğu hâlde meclis-i şer‘-i hatîr-i lâzımü’t-tevkīrde işbu hâmilü’r-rakīm Karabet v. Mardıros nâm zimmî muvâcehesinde ikrâr-ı tam ve takrîr-i kelâm edip zevcim hâlik-i mersûm Halebli Ceyor zimmînin bâlâda zikr ve beyân olunan destgâhlardan ile’l-helâk yedinde bâ-hüccet-i şer‘iye mâlı olup ba‘de helâkihî benimle vasîleri olduğum sıgār-ı mesfûrun müvekkile-i mersûmeye mevrûs olan yedi aded destgâhı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile el-yevm semen-i misilleri idüğü zâhir olan bin dört yüz guruşa mersûm Karabet zimmîye ben bi’l-asâle ve bi’l-vekâle ve hâzır-ı mersûm bi’l-vekâle bey‘ ve temlik ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ü kabûl ve semenleri olan meblağ-ı merkūm bin dört yüz guruşu bize def‘ ü teslîm eylediğinde biz dahi yedinden bi’l-asâle ve bi’l-vesâye ve bi’l-vekâle ahz ü kabz ve hâlik-i mersûmun defter-i kassâmına idhâl edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden mersûm Karabet zimmînin ben ve hâzır-ı mersûm ancak bi’l-asâle ve bi’l-vekâle ibrâ-i âmm-ı sahîh-i şer‘î ile kabûlü hâvî ibrâ ve iskāt eylediğimizde ol dahi husûs-ı mezkûra müte‘allika kezâlik âmme-i da‘vâdan benim ve vasîleri olduğum sıgār-ı mersûmûnun ve kızım müvekkile-i mersûmenin ve vekîl-i hâzır-ı mersûmun zimmetlerini ibrâ ve iskāt ve her birimiz ber-vech-i muharrer âharın ibrâsını kabûl etmemizle fîmâ-ba‘d zikr olunan yedi aded destgâhda benim ve vasîleri olduğum sıgār-ı mersûmûnun ve kızım müvekkile-i mersûmenin kat‘a alâka ve medhalimiz kalmayup mersûm Karabet zimmînin mâl-ı müşterâsı ve hakk-ı sırfı olmuşdur dedikde gıbbe’t-tasdîki’l-mu‘teber mersûm Karabet zimmî meclis-i şer‘-i hatîr-i lâzımü’t-tevkīrde vasî-i mersûme Varvat Nasrâniye muvâcehesinde ikrâr-ı tam ve takrîr-i kelâm edip ânifen şirâen mâlik olduğum yedi aded destgâhımın beş adedini sagīr-i mersûm Anton içün bin guruşa ve iki adedini sagīr-i mersûm Corci içün dört yüz guruşa ki cem‘an bin dört yüz guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile vasîleri mersûme Varvat Nasrâniyeye bey‘ ve temlik ve teslîm eylediğimde ol dahi bi’l-izni’ş-şer‘î sagīrân-ı mersûmân içün bi’l-asâle iştirâ ve temellük ve kabz ü kabûl ve semenleri olan meblağ-ı mecmû‘-ı merkūm bin dört yüz guruşu sagīrân-ı mersûmânın mâllarından bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan sagīrân-ı mersûmân ile vasîleri mersûme Varvat Nasrâniyenin zimmetlerini vasî-i mersûmenin kabûlünü hâvî ibrâ-i âmm-ı sahîh-i şer‘î ile ibrâ ve iskāt dahi etmememle fîmâ-ba‘d zikr olunan yedi aded destgâhın beş adedi sagīr-i mersûm Anton’un ve iki adedi sagīr-i mersûm Corci’nin mâl-ı müşterâları olup benim aslâ ve kat‘a alâka ve medhalim kalmamışdır dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 16 Ca sene 1238. Şühûdü’l-hâl: Molla Mahmud el-Muhzır, Molla Halil el-Muhzır, Molla Hüseyin el-Muhzır, Molla Osman el-Muhzır ve gayruhum.