İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 201 Hüküm no: 168 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. İsmail’in kuruyemişci dükkânını Tavar-oğlu Mustafa Ağa b. Mustafa’ya sattıkları Kuruyemişci Mahmiye-i İstanbul’da kâin kuruyemişci esnâfından es-Seyyid Mustafa Ağa b. es-Seyyid İsmail nâm kimesne meclis-i şer‘-i şerîf-i enverde esnâf-ı merkūmeden işbu bâ‘isü’l-kitâb Tavar-oğlu Mustafa Ağa b. Mustafa mahzarında ikrâr-ı tam ve takrîr-i kelâm edip mahmiye-i İstanbul hısnı ebvâbından Zindân kapısı hâricinde kuruyemişciler içinde Emir Mehmed ve Peştemâlci İsmail Ağa dükkânları beynlerinde kâin Coşkunoğlu dükkânı demekle ma‘rûf bir bâb kuruyemişci dükkânı derûnunda mevcûde yüz yirmi sehm i‘tibâriyle beyne’l-esnâf gedik ta‘bîr olunur akd-i âti’z-zikrin sudûruna değin mecmû‘u bâ-hüccet-i şer‘iye yedimde mâlım ve mülküm olan âlât-ı lâzıme-i ma‘lûmenin ber-i‘tibâr-ı merkūm nısfı olan altmış sehmi işbu târih-i hüccet günü işbu hâzır bi’l-meclis Ali Fevzi oğlu es-Seyyid Molla Hasan b. Ali’ye diğer bir kıt‘a hüccet-i şer‘iye mantûkunca semen-i ma‘lûm ve makbûza bey‘ ve temlik ve teslîm etmemle nısf-ı âharı olan altmış sehmini tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile ve hâzır-ı mezbûrun izin ve icâzetleriyle dört bin üç yüz yetmiş beş guruşa mezbûr Tavar-oğlu Mustafa Ağa’ya bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm dört bin üç yüz yetmiş beş guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemle fîmâ-ba‘d âlât-ı lâzıme-i mezkûrede benim kat‘a alâka ve medhalim kalmayup ber-i‘tibâr-ı merkūm altmış sehmi merkūm Tavar-oğlu Mustafa Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 12 Ca sene 1238. Şühûdü’l-hâl: Kethudâ Mustafa Ağa b. Halil, Uzun Mehmed Ağa b. Hasan, es-Seyyid el-Hâc Ahmed b. Ali, el-Hâc Veliyüddin Ağa b. Mehmed ve gayruhum.