İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 202 Hüküm no: 169 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tavaroğlu Mustafa Ağa b. Mustafa ve Ali Fevzi oğlu Molla Hasan b. Ali’nin kuruyemişci dükkânlarını borçlarına karşılık Mustafa Ağa b. Halil’e rehin bıraktıkları Kuruyemişci gediğini idâne Mahmiye-i İstanbul’da kâin kuruyemişci esnâfından Tavar-oğlu Mustafa Ağa b. Mustafa ve Ali Fevzi oğlu es-Seyyid Molla Hasan b. Ali nâm kimesneler meclis-i şer‘-i şerîf-i enverde Dergâh-ı âlî -dâme mahfûfen bi’l-me‘âlî- dokuzuncu sekbânları odasının nukūd-ı mevkūfesi mütevellîsi işbu bâ‘isü’l-kitâb Kuruyemişciler Kethudâsı diğer Mustafa Ağa b. Halil mahzarında ikrâr-ı tam ve takrîr-i kelâm edip mahmiye-i mezbûre hısnı ebvâbından Zindân kapısı hâricinde kuruyemişciler sûkunda vâki‘ Emir Mehmed ve Peştemâlci İsmail Ağa dükkânlarında kâin Coşkunoğlu dükkânı demekle arîf bir bâb kuruyemişci dükkânı derûnunda mevcûde yüz yirmi sehm i‘tibâr olunan beyne’l-esnâf gedik ta‘bîr olunur âlât-ı lâzıme-i ma‘lûmenin yedlerimizde olan hüccet-i şer‘iyeler mantûklarınca i‘tibâr-ı merkūm üzere munâsafeten altmış sehmi şirâen mâlımız ve mülkümüz olmağla biz âlât-ı lâzımeyi mütevellî-i merkūm Mustafa Ağa’ya mâl-ı vakıftan bana idâne edeceği zikri âtî meblağ mukābilinde ma‘an rehin vaz‘ ve teslîm eylediğimizde ol dahi irtihân ve kabz ü kabûl ettikden sonra mezbûr diğer Mustafa Ağa mütevellîsi olduğu oda-i merkūme nukūd-ı mevkūfesinden bize beş bin guruş idâne ve teslîm biz dahi yedinden bi’l-ma‘iye iştirâken istidâne ve kabz ve umûrumuza sarfla istihlâk edip meblağ-ı mezbûr ile semenleri işbu târih-i kitâbdan bir sene tamamına değin müeccel ve mev‘ûd yine vakf-ı merkūm mâlından mütevellî yedinden kezâlik bi’l-ma‘iye iştirâken iştirâ ve kabz eylediğimiz bir cild Riyâzu’l-Kasımîn ve bir cild Netîcetü’l-fetâvâ semenlerinden dahi yedi yüz elli guruş ki cem‘an beş bin yedi yüz elli guruş zimmetimizde nısfiyet üzere iştirâken vakf-ı merkūm içün mütevellî-i mezbûr diğer Mustafa Ağa’ya vâcibü’l-edâ deynimizdir dediklerinde gıbbe’t-tasdîk yine esnâf-ı merkūmeden Keskinoğlu es-Seyyid Mehmed Ağa b. es-Seyyid Ahmed nâm kimesne meclis-i şer‘-i münîrde mütevellî-i merkūm diğer Mustafa Ağa mahzarında ikrâr-ı tam ve takrîr-i kelâm edip mukırrân-ı mezbûrân Tavar-oğlu Mustafa Ağa ve Ali Fevzi [oğlu] es-Seyyid Molla Hasan’ın zimmetlerinde vakf-ı merkūm içün mütevellî-i mezbûr diğer Mustafa Ağa’ya nısfiyet üzere iştirâken deynleri olan meblağ-ı mecmû‘-ı merkūm beş bin yedi yüz elli guruşa tarafeynden bi’l-emr ve’l-kabûl kefâlet-i mutlaka-i sahîha-i şer‘iye ile ben dahi kefîl bi’l-mâl ve dâmin oldum dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 13 Ca sene 1238. Şühûdü’l-hâl: Süleyman Efendi b. el-Hâc Osman, Mehmed Yazıcı b. Mehmed Sadık, İbrahim Yazıcı b. Mustafa, es-Seyyid el-Hâc Veliyüddin Ağa b. Mehmed, es-Seyyid el-Hâc Ahmed Ağa b. Ali, Uzun Mehmed Ağa b. Hasan.