Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 332 Hüküm no: 364 Orijinal metin no: [57a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Ahmed’in ölen kocası Salih Çelebi b. İbrahim’in terekesinden mehir ve hisse alacağının olduğu Mahmiye-i İstanbul’da Sofular mahallesinde sâkine bâ‘isü hâzihi’l-vesîka Ayşe bt. Ahmed nâm hâtun meclis-i şer‘-i şerîfde mahmiye-i mezbûrda Yahnikapanı mahallesinde sâkin iken bundan akdem vefât eden Sâlih Çelebi b. İbrahim b. Himmet’in zevce-i metrûkesi ve sagīre kızı Fâtıma’nın tesviye-i umûruna kıbel-i şer‘den mansûbe vasîsi olmağla terekesine vâzı‘atü’l-yed olduğu mütehakkik olan diğer Ayşe bt. İbrahim nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Mustafa Çelebi b. Hasan ve el-Hâc Abdülkādir b. Ahmed şehâdetleriyle şer‘an sâbit olan Mustafa Çelebi b. Murad mahzarında üzerine da‘vâ ve takrîr-i kelâm edip ben târih-i kitâbdan sekiz sene mukaddem kırk bin akçe mehr-i müeccel tesmiyesiyle nefsimi mahzar-ı şuhûdda mezbûr Sâlih Çelebi’ye hayâtında inkâh ve tezvîc ol dahi tezevvüce ve kabûl ve bana duhûl [edip vefâtında terekesi Ayşe] hâtun ile sulbiye sagīre kızı Fâtıma’ya münhasıra olmağın hâlâ müvekkile-i mezbûre Ayşe Hâtun suâl olunup müteveffâ-yı mezbûrun zimmetinde mütekarrir ve ma‘kūdun-aleyh olan kırk bin akçe mehr-i müeccelimi ve nısf-ı sümün hisse-i irsiyyemi müteveffâ-yı mezbûrun terekesinden alıverilmesi matlûbumdur dedikde gıbbe’s-suâl vekîl-i mezbûr cevâbında müvekkile-i mezbûre müteveffâ-yı mezbûrun terekesine vâzı‘atü’l-yed olduğu ikrâr lâkin müdde‘iye-i mezbûre müteveffâ-yı mezbûrun ber vech-i muharrer zevce-i metrûkesi olduğu inkâr edicek müdde‘iye-i mezbûreden müdde‘âsını mübeyyine beyyine taleb olundukda zikr olunan Sofular mahallesinde sâkin Sâlih Çelebi b. Zülfikār ve Yedikule kurbunda Hâce Hâtun mahallesinde sâkin Mehmed Çavuş b. Hasan nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘iye-i mezbûre Ayşe bt. Ahmed târih-i kitâbdan sekiz sene mukaddem kırk bin akçe mehr-i müeccel tesmiyesiyle nefsini müteveffâ-yı mezbûr Sâlih Çelebi b. İbrahim b. Himmet’e bizim huzûrumuzda inkâh ve tezvîc mezbûr Sâlih Çelebi dahi tezevvüc ve kabûl ve duhûl edip işbu müdde‘iye-i [57b] mezbûre dahi müteveffâ-yı mezbûrun ile’l-vefât zevce-i menkûhasıdır biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde şâhidân-ı mezbûrânın keyfiyyet-i hâllerini mahalleleri ahâlîsinden suâl için savb-ı şer‘den Mevlânâ Şaban Efendi b. Halil irsâl olunup ol dahi evvelâ mârrü’z-zikr Sofular mahallesine varıp ahâlîsinden imâm Muharrem Efendi b. Himmet ve Mustafa Çelebi b. Hasan ve Ahmed Efendi b. Mehmed ve Mehmed Beşe b. Mustafa ve Mehmed Çelebi b. Hasan ve Mustafa Halîfe b. Ramazan ve Ali Çelebi b. Mehmed ve Mehmed Çelebi b. el-Hâc Derviş ve Yusuf b. Abdullah nâm kimesnelerden ve gayrılardan şâhid-i mezkûr Sâlih Çelebi’nin hâlleri suâl olunup sâniyen zikr olunan Hatice Hâtun mahallesi ahâlîsinden suâl olunup şâhid-i mezbûr Mehmed Çavuş’un keyfiyyet-i hâlini suâl eyledikde her biri şâhidân-ı mezbûrân adl ve makbûlü’ş-şehâde olduklarını mahallinde tahrîr ve ma‘an irsâl olunan Ebûbekir b. Hüseyin ile meclis-i şer‘a gelip alâ vukū‘ihî inhâ ve takrîr etmeğin şâhidân-ı mezbûrân sırren ve alenen ta‘dîl ve’t-tezkiyye olunduklarından sonra şehâdetleri makbûle olup ve müdde‘iye-i mezbûra meblağ-ı mezbûr mehr-i müecceli olan kırk bin akçeyi müteveffâ-yı mezbûrdan hayâtında küllen ve ba‘zan ahz u istîfâ veya hibe etmeyip ve bi’l-cümle turûk-ı şer‘îden bir tarîkle zimmetini ibrâ etmediğine yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince hükm ve’l-kazâ meblağ-ı mezbûr kırk bin akçe mehr-i müeccel ile nısf-ı sümün hisse-i şer‘iyyesini müteveffâ-yı mezbûr Sâlih Çelebi’nin terekesinden müdde‘iye-i mezbûre Ayşe Hâtun’a edâ ve teslîme vekîl-i mezbûra tenbîh birle mâ vaka‘a bi’t-taleb ketb olundu. Fi’l-yevmi’s-sânî aşer min Receb li sene seb‘a ve tis‘în ve elf. Şuhûdü’l-hâl: Mustafa Çelebi b. Hasan, el-Hâc Abdülkādir b. Ahmed, el-Hâc Mustafa b. Tevekkül, Mustafa Çelebi b. Ahmed ve gayruhüm.