İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 206 Hüküm no: 172 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Soteri v. Sava’nın bakkal dükkânını Ali Beşe b. Mehmed’e sattığı Çarşamba’da İstanbul Ağası bakkāl Mahmiye-i İstanbul’da kâin bakkāl esnâfından Soteri v. Sava nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu bâ‘isü’l-kitâb Ali Beşe b. Mehmed nâm kimesne muvâcehesinde ikrâr-ı tam ve takrîr-i kelâm edip mahmiye-i İstanbul’da Çarşamba pazarı kurbünde Mehmed Ağa Câmi‘-i [şerîfi] civârında vâki‘ İstanbul Ağası dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi âharın ve mâ‘adâ altmış sehm hisse-i şâyi‘ası akd-i âti’z-zikrin sudûruna değin iki kıt‘a hüccet-i şer‘iye ile benim yedimizde iştirâken mâlımız ve mülkümüz olmağın ben âlât-ı lâzıme-i mezkûreden ber-i‘tibâr-ı merkūm mâlik olduğum altmış sehm hisse-i şâyi‘a-i mezbûremi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile ve âhar şerîkim izin ve icâzeti ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle merkūm Ali Beşe’ye dört yüz guruşa bey‘ ve temlik ve vech-i lâyıkı üzere teslîm eylediğimde ol dahi << ber-minvâl-i muharrer >> yedimden ber-minvâl-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm dört yüz guruşu bana def‘ ü teslîm ben dahi yedinden ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunan âlât-ı lâzıme-i mezkûrede benim kat‘a alâka ve medhalim kalmayup i‘tibâr-ı merkūm üzere altmış sehm hisse-i şâyi‘a merkūm Ali Beşe’nin mâl-ı müşterâsı ve hakk-ı sırf-ı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 14 Ca sene [1]238. Şühûdü’l-hâl: Pazarbaşı Süleyman Ağa, Kâtib Ahmed Efendi, Bölükbaşı Abdi.