İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 208 Hüküm no: 174 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tahtakaleli İsmail Usta b. Mehmed’in helvacı esnafı kethudalığına tayini Helvacı kethudâ nasbı Âsitâne-i aliyye -dâmet fi’l-himâyeti’r-Rabbâniye-de vâki‘ helvacı esnâfının kethudâları olan es-Seyyid İbrahim Ağa nâm kimesne esnâf-ı mezkûrenin umûrunu idâre ve rü’yet etmeyip bir müddetden beri terk edip yerine esnâf-ı mezkûrenin umûrunu kemâ-hüve hakkuhû idâre ve rü’yet eder bir kethudâ nasbı lâzım geldiğini esnâf-ı mezkûrenin ihtiyâr ve ustalarından sâbık Kethudâ es-Seyyid Ali Ağa ve mütevellî Mehmed Alemdar ve Salmatomruklu Hasan Ağa ve Kantarcılarlı el-Hâc Mehmed Ağa ve Beşiktaşlı diğer el-Hâc Mehmed Ağa ve Üsküdarlı İsmail Ağa ve Tavukpazarlı Mehmed Ağa ve Karagümrüklü Mehmed Usta ve Üsküdarlı Ahmed Usta ve Tophâneli Ömer Alemdar ve Nişâncalı Hüseyin Usta ve Kasımpaşalı Mehmed Usta ve Seyyid Mustafa Usta ve Odunkapılı es-Seyyid Ahmed Alemdar ve Irgadpazarlı Ahmed Usta ve Kumkapılı Hüseyin Usta ve Tahtakaleli Receb Alemdar ve Hocapaşalı es-Seyyid Halil Usta ve diğer Ahmed Usta nâm kimesneler ihbâr ve esnâf-ı mezkûreden olup örf ve âdetlerine vâkıf ve şurût-ı nizâmlarını arîf ve her vechile kethudâlık uhdesinden gelmeğe kādir idüğü mütehakkık olan işbu bâ‘isü’l-kitâb Tahtakaleli İsmail Usta b. Mehmed nâm kimesnenin kethudâ nasb ü ta‘yîn olunmasını iltimâs etmeleriyle hâkim-i muvakkı‘-ı sadr-ı kitâb -bi-tevkī‘ihi’r-refî‘i’l-müstetâb tûbâ-lehû ve hüsnü-meâb- efendi hazretleri dahi merkūm İsmail Usta’yı iltimâsları üzere kethudâ nasb ve ta‘yîn edip esnâfından bir ferde hilâf-ı şer‘-i şerîf te‘addî ve rencîde ve mugāyir-i nizâm tecrîm ve tekdîr etmeyip umûr-ı lâzımelerini kemâ-hüve hakkuhû idâre ve rü’yet etmek üzere emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-vaka‘a bi’t-taleb ketb olundu. Fî 27 Ca sene 1238. Şühûdü’l-hâl: Molla Mahmud el-Muhzır, Molla Halil el-Muhzır, Molla Hüseyin el-Muhzır ve gayruhum.