İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 209 Hüküm no: 175 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Beşe b. Ahmed’in manav dükkânı gediğini Ömer Ağa b. Mustafa’ya sattığı Manav gediği Mahmiye-i İstanbul’da kâin manav esnâfından Halil Beşe b. Ahmed nâm kimesne meclis-i şer‘-i şerîf-i enverde işbu bâ‘isü’l-kitâb el-Hâc Ömer Ağa b. Mustafa nâm kimesne mahzarında ikrâr-ı tam ve takrîr-i kelâm edip mahmiye-i mahkiyede Sîmkeşhâne kurbünde eski Darbhâne fırını civârında Manav Musa dükkânı ve Sadık Beşe kahvehânesi beynlerinde kâin bir bâb manav dükkânı derûnunda mevcûde beyne’l-hıref gedik ta‘bîr olunur akd-i âti’z-zikrin sudûruna değin yedimde müstakıllen emvâlim olan bir kantar ve iki ma‘a derâhim ve sâir âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm el-Hâc Ömer Ağa’ya dört bin guruşa bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm dört bin guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunur âlât-ı lâzıme-i mezkûrede benim kat‘a alâka ve medhalim kalmayup merkūm el-Hâc Ömer Ağa’nın mülk-i müşterâsı ve hakk-ı sırf-ı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 27 Ca sene 1238. Şühûdü’l-hâl: Pazarbaşı es-Seyyid İbrahim Sârım Bey, Musa Yazıcı, Eminönü’nde Hacı Yunuszâde Mehmed Ağa, Darbhâne’de es-Seyyid Musa Ağa.