İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 209 Hüküm no: 176 Orijinal metin no: [42b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. İsmail’in kuruyemişci dükkânını Ali Fevzi oğlu Molla Hasan b. Ali’ye sattığı Kuruyemişci Mahmiye-i İstanbul’da kâin kuruyemişci esnâfından es-Seyyid Mustafa Ağa b. İsmail nâm kimesne meclis-i şer‘-i hatîr-i lâzımü’t-tevkīrde esnâf-ı merkūmeden işbu bâ‘isü’l-kitâb Ali Fevzi oğlu es-Seyyid Molla Hasan b. Ali mahzarında ikrâr-ı tam ve takrîr-i kelâm edip mahmiye-i İstanbul hısnı ebvâbından Zindân kapısı hâricinde Kuruyemişciler içinde Emir Mehmed ve Peştemâlci İsmail Ağa dükkânları beynlerinde kâin Coşkunoğlu dükkânı demekle arîf bir bâb kuruyemişci dükkânı derûnunda mevcûde yüz yirmi sehm i‘tibâriyle beyne’l-esnâf gedik ta‘bîr olunur akd-i âti’z-zikrin sudûruna değin mecmû‘u bâ-hüccet-i şer‘iye << mantûkunca >> yedimde mâlım ve mülküm olan âlât-ı lâzıme-i ma‘lûmenin ber-i‘tibâr-ı merkūm nısfı olan altmış sehmini işbu târih-i hüccet günü işbu hâzır bi’l-meclis Tavar-oğlu Mustafa Ağa b. Mustafa’ya diğer bir kıt‘a hüccet-i şer‘iye mantûkunca semen-i ma‘lûm ve makbûza bey‘ ve temlik ve teslîm etmemle nısf-ı âharı olan altmış sehmini dahi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve hâzır-ı mezbûrun izin ve icâzetiyle dört bin üç yüz yetmiş guruşa mezbûr Ali Fevzi oğlu es-Seyyid Molla Hasan’a bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm dört bin üç yüz yetmiş beş [guruşu] bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim kat‘a alâka ve medhalim kalmayup ber-i‘tibâr-ı merkūm altmış sehmi mezbûr Ali Fevzi oğlu [43a] Molla Hasan’ın mâl-ı müşterâsı ve hakk-ı sırf-ı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 12 Ca sene 1238. Şühûdü’l-hâl: Kethudâ Mustafa Ağa b. Halil, Uzun Mehmed Ağa b. Hasan, es-Seyyid el-Hâc Ahmed Ağa b. Ali, el-Hâc Veliyüddin Ağa b. Mehmed, İbrahim Yazıcı b. Mustafa.