İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 210 Hüküm no: 177 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun bt. Süleyman’ın soğan dükkânını damadı Baklacızade Ali Yazıcı b. Mehmed’e sattığı Soğancı gediği mübâya‘asıdır. Mahmiye-i İstanbul’da Zeyrek kurbünde Demirhan mahallesi sâkinelerinden olup zeyl-i kitâbda muharrerü’l-esâmî Müslimîn ta‘rîfleriyle mu‘arrefe olan Fatıma Hatun bt. el-Hâc Süleyman meclis-i şer‘-i hatîr-i lâzımü’t-tevkīrde mukaddemâ dâmâdı Odunkapısı tüccârından işbu bâ‘isü’l-kitâb Baklacızâde es-Seyyid Ali Yazıcı b. es-Seyyid Mehmed mahzarında bi-tav‘iha ikrâr-ı tam ve takrîr-i kelâm edip mahmiye-i mezbûrede Odunkapısı hâricinde kâin es-Seyyid el-Hâc Osman Ağa ve es-Seyyid el-Hâc Halil dükkânları beynlerinde vâki‘ bir bâb Soğancı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin dört sehm i‘tibâriyle üç sehmi mezbûr es-Seyyid Ali Yazıcı’nın yedinde mâlı ve mülkü olmağla mâ‘adâsı olup akd-i âtiyyü’z-zikrin sudûruna değin yedimde mâlım ve mülküm olan bir sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bât-ı sahîh-i şer‘î ile bin guruşa mezbûr es-Seyyid Ali Yazıcı’ya bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm dört bin guruşu bana def‘ ü teslîm ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim kat‘a alâka ve medhalim kalmayup i‘tibâr-ı merkūm üzere üç sehmi mukaddemâ ve bir sehmi ber-minvâl-i muharrer şirâen ki mecmû‘u mezbûr es-Seyyid Ali Yazıcı’nın mâlı ve mülkü olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 20 Ca sene 1238. Şühûdü’l-hâl: Kethudâ Ömer Ağa b. Veliyüddin, es-Seyyid el-Hâc Osman Ağa b. es-Seyyid Ali, Hafız Mehmed b. Ahmed, es-Seyyid İbrahim Edhem Ağa b. es-Seyyid el-Hâc Halil ve gayruhum.