İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 212 Hüküm no: 179 Orijinal metin no: [43a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Yayla’nın hazırcı çukacı dükkânını Antıranik v. Karabet’e sattığı Hâzırcı çukacı Mahmiye-i İstanbul’da kâin hâzırcı çukacı esnâfından Kirkor v. Yayla zimmî meclis-i şer‘-i şerîf-i enverde yine esnâf-ı mezkûreden işbu hâmilü’r-rakīm Antıranik v. Karabet nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûrede bitpazarı kurbünde Alipaşa Hân’ında tabaka-i ulyânın sağ tarafında vâki‘ on ikinci bir bâb hâzırcı çukacı odası derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bir kıt‘a mülknâme-i hümâyûn mantûkunca yedimde mâlım ve mülküm olan âlât-ı lâzıme-i ma‘lûmesinin nısflarını yedimde ibkā ve nısf-ı âharlarını tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile iki bin guruşa mesfûr Antiranik zimmîye bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan iki bin guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan oda gediği ta‘bîr olunur âlât-ı lâzıme-i ma‘lûmenin nısflarında benim kat‘a alâka ve medhalim kalmayup mesfûr Antiranik zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 21 Ca sene 1238. Şühûdü’l-hâl: Muhzır Kethudâ Hafız İsmail Efendi b. Mustafa, Muhzır Molla Hüseyin b. Yusuf, Muhzır Molla Mahmud b. Mahmud, Ustabaşı Serope v. Karabet zimmî, Ustabaşı Tavit v. Baron.