İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 212 Hüküm no: 180 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aranik bt. Ohannes’in mâlik olduğu kuyumcu dükkânı için kendisine hüccet verildiği Kuyumcu mübâya‘ası Mahmiye-i İstanbul’da Balat kurbünde Hâmmâmî Muhyiddin mahallesinde mütemekkine bâ‘isetü’r-rakīm Aranik bt. Ohannes nâm Nasrâniye tarafında husûs-ı âti’l-beyânda vekîl-i sâbitü’l-vekâlesi kuyumcu esnâfının mütevellîsi Takfor v. Moğses nâm zimmî meclis-i şer‘-i hatîr-i lâzımü’t-tevkīrde bi’l-vekâle takrîr-i kelâm ve ta‘bîr ani’l-merâm edip mahmiye-i mezbûrede kuyumcular içinde vâki‘ Papazoğlu sokağında bezzâzistân-ı atik önünde kolancılara gider iken sol tarafta kâin dördüncü şehriye yüz para kadîm kirâlı ma‘lûmü’l-hudûd bir bâb kuyumcu dükkânı derûnunda mevcûde beyne’l-esnâf gedik ta‘bîr olunur bir örs ve bir çekiç ve bir akçe tahtası ve bir peştahta ve sâir âlât-ı lâzıme-i ma‘lûme müvekkilem mersûme Aranik Nasrâniyenin yedinde müstakılleten mâlı ve mülkü olup lâkin ber-vech-i muharrer mâlike olduğunu müş‘ir yedinde hücceti olmamağla husûs-ı merkūm ehl-i vukūftan lede’l-istihbâr kıbel-i şer‘den yedine bir kıt‘a hüccet i‘tâ olunmak matlûbumdur dedikde hâl bâlâda bast ve beyân olunduğu üzere kuyumcu esnâfının kethudâsı Ali Ağa nâm kimesne ile sâir mazbûtü’l-esâmî kuyumcu ustaları alâ-tarîki’ş-şehâde haber vermeleriyle vâki‘u’l-hâl hıfzen li’l-makāl işbu vesîka-i enîka bi’l-ibtiğā ketb olundu. Fî 26 Ca sene 1238. Şühûdü’l-hâl: Muhzır Molla Halil, Muhzır Molla Hüseyin, Muhzır Molla Mahmud ve gayruhum.