İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 213 Hüküm no: 181 Orijinal metin no: [43b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agop v. Abraham’ın mâlik olduğu kuyumcu dükkânını Oskohi bt. Kirkor’a sattığı Kuyumcu mübâya‘ası Mahmiye-i İstanbul’da kâin kuyumcu esnâfından Agop v. Abraham nâm zimmî meclis-i şer‘-i hatîr-i lâzımü’t-tevkīrde bâ‘isü’l-kitâb Oskohi bt. Kirkor nâm Nasrâniyenin zevci ve tarafından husûs-ı âti’l-beyânı tasdîka vekîl-i şer‘îsi Bahçivanoğlu Mikâil v. Ohannes nâm zimmî muvâcehesinde ikrâr-ı tam ve takrîr-i kelâm edip mahmiye-i merkūmede Çarşı-yı Kebîr’de kuyumcular içinde vâki‘ Reisoğlu sokağının sağ tarafı başından i‘tibâriyle derûnunda iki gedik i‘tibâr olunan şehriye kırk para kadîm kirâlı onikinci bir bâb kuyumcu dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan bir örs ve bir çekiç ve bir firenk ocağı ve bir peştahta ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î bin beş yüz guruşa müvekkile-i mersûme Oskohi Nasrâniyeye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin beş yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzımede benim kat‘a alâka ve medhalim kalmayup müvekkile-i mersûme Oskohi Nasrâniyenin mülkü ve mâlı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 26 Ca sene 1238. Şühûdü’l-hâl: Kethudâ Ali Ağa, Muhzır Mahmud, Muhzır Hüseyin, mütevellî Takor v. Karabet, Nâzır Bedros zimmî.