Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 334 Hüküm no: 365 Orijinal metin no: [57b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey b. Ali Paşa’nın dükkânındaki kiracı İstifo’nun eşyalarına el konulması Mahmiye-i İstanbul’da Mi‘mâr Sinan mahallesi sükkânından umdetü’l-emâcid ve’l-ekâ[r]im Ahmed Bey b. el-merhûm Ali Paşa tarafından husûs-ı âti’z-zikre sâbitü’l-vekâle vekîl olan İshak Çelebi b. Ahmed meclis-i şer‘-i şerîfde takrîr-i kelâm edip mûmâ-ileyh Ahmed Bey taht-ı tasarrufunda olup mahmiye-i mezbûrda Molla Gürânî mahallesinde vâki‘ bir bâb kür[k]çü dükkânda müste’cir olan İstifo nâm zimmî üç ay mukaddem dükkânı mukaffel bırakıp gayb ve firâr etmekle dükkân-ı mezbûr mu‘attal kalmağın savb-ı şer‘den üzerine varılıp dükkân-ı mezbûr feth ve gāib-i mezbûrun dükkân-ı mezbûrda mevcûd olan eşyâsı tahrîr ve bir mü’temen kimesneye emânet vaz‘ ve dükkân-ı mezbûr tahliyye ve bana teslîm olunması matlûbumdur deyû husûs-ı mezbûr için buyruldu-yı şerîf dahi ibrâz etmeğin imtisâlen-leh savb-ı şer‘den Mevlânâ Ebûbekir Efendi irsâl olunup ol dahi zeyl-i kitâbda muharrerü’l-esâmî müslimîn ile mahalle-i mezbûreye varıp dükkân-ı mezbûru feth ve gāib-i mezbûrun dükkân-ı mezbûrda mevcûd olup ba‘de’t-tahrîr vekîl-i mezbûr[a] bi tarîki’l-emâne teslîm eylediği eşyâsıdır ki vech-i âtî üzre zikr olunur. [Fi’l-yevmi’]l-ışrîn min Recebi’l-ferd li sene seb‘a ve tis‘în ve elf. Kürk parçasından dolma yastık 4 aded Hâlî ağaç sandık 1 aded Hâlî kutu 1 aded Alaca meşin 1 aded Tağar 1 aded Sincab kürk parçası 1 aded Urgan 1 aded Köhne zıbın 1 aded Köhne kese 1 aded Kuzu kürkü parçası 4 aded Köhne zerdeva parçası 2 aded Köhne tilki kürk parçası 3 aded Köhne saç parçası 3 aded Demir kazma 1 aded Şuhûdü’l-hâl: Ali Beşe b. Mehmed, Mehmed b. Ahmed, Mustafa b. Ahmed, Mehmed b. Abdullah, İbrahim Beşe b. Ahmed, Yusuf b. Abdullah, sarrâc Halil.