İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 228 Hüküm no: 199 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Baklacızade Ali Yazıcı b. Ahmed’in mâlik olduğu soğancı dükkânını Mustafa Yazıcı b. İbrahim’e sattığı Soğancı Mahmiye-i İstanbul’da Odunkapısı tüccârından Baklacızâde es-Seyyid Ali Yazıcı b. es-Seyyid Ahmed nâm kimesne meclis-i şer‘-i şerîf-i enverde iş bu bâ‘isü’l-kitâb es-Seyyid Mustafa Yazıcı b. İbrahim nâm kimesne mahzarında ikrâr-ı tam ve takrîr-i kelâm edip mahmiye-i mahkiyede Odunkapısı hâricinde kâin es-Seyyid el-Hâc Osman Ağa ve es-Seyyid el-Hâc Halil Ağa dükkânları beynlerinde vâki‘ bir bâb Soğancı dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet-i şer‘iye müstakıllen yedimde mâlım ve mülküm olan âlât-ı lâzıme-i ma‘lûmenin dört sehm itibariyle iki sehmini yedimde ibkā mâ‘adâ iki sehm hisse-i şâyi‘asını tarafeynden îcâb ve kabûlü hâvî şurût-ı müfsideden ârî bey‘i bâtt-ı sahîh-i şer‘î ve safka-i vâhide ile üç bin beş yüz guruşa merkūm Mustafa Yazıcı’ya bey‘ ve temlik ve vech-i lâyıkı üzere teslim eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl ve semeni olan meblağı merkūm üç bin beş yüz guruşu bana def‘ ü teslim eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i ma‘lûmenin i‘tibâr-ı mezkûr iki sehm hisse-i şâyi‘a-i mezkûresinde benim kat‘a alâka ve medhalim kalmayup merkūm es-Seyyid Mustafa Yazıcının mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî-gurre-i Ca sene 1238. Şühûdü’l-hâl: Kethudâ Ömer Ağa b. Veliyüddin, es-Seyyid Osman Ağa b. es-Seyyid Ali, Mütevellî Halil Ağa b. Halil, Hafız Mehmed Ağa b. Ahmed, es-Seyyid Mahmud Ağa b. el-Hâc Osman, Yunus Ağa b. Süleyman.